Tura, Jan 18: Meghalaya Gamesni itihaso skanggipa changna a·doko songpanggipa Garo, Khasi aro Jaintia jatrango chengonin dongbagipa kal·susaanirangko ra·gate kal·ataha.
Khasi jato skangonin Mawpoin ine kal·bagipako Meghalaya Gameso napataha. Ua kal·aniko A·chik a·songoba Seven Stones ba Rong·gatsni ine, rong·te rongsniko gatdoe kal·a, indiba Mawpoin-ode rong·te rongsnini pal rong 24ko gatdona nanga.
A·chikrangni Wa·pong Sika aro Jaintiarangni Rah Mookhrah-koba ia changoni napataha. Rah Mukhrah-ko A·chikrang Rong·ma Chilsusaa ine mingskaa.
Me·asarangni sakprakprak Rah Mookhrah kal·anio West Jaintia Hillsni Daoohi Dhar skanggipa, West Jaintia Hillsni Meuru Suna gnigipa aro East Khasi Hillsni Vincent Bareh gittamgipa ong·e cheaha.
Me·asarangni Wa·pong Siksusaanio West Garo Hillsni Pangrak R. Marak cheaha; gnigipa biapko West Jaintia Hillsni Lambai Challam aro gittamgipa biapko West Jaintia Hillsni Lambhamiki Passah man·angaha.
Jinma ba dol dake Rah Mookhrah kal·anio West Jaintia Hills cheaha; gnigipa biapko East Khasi Hills man·aha. West Jaintia Hills rong 5 ro·ongrangko minit 2 second 6-o chilaha; East Khasi Hillsni susagiparang minit 2 second 10-o rong 4ko chilna man·aha.
Me·chikrangni jinma ba dol dake Mawpoin susanio East Khasi Hills skanggipa ong·aha, gnigipa biapko West Garo Hills aro gittamgipa biapko West Jaintia Hills man·aha.
Me·asarangni jinma ba dol dake Mawpoin kal·anio East Khasi Hills skanggipa biapko man·aha; gnigipa biapko West Garo Hills aro gittamgipa biapko West Jaintia Hills man·aha.
.
Chegiparangna boksisrangko PHE Minister Marcuise N. Marak, Samanda C&RD Blockni Chairman Jerubell Marak aro HubNewsni Chief Editor Simon George S. Marak on·aha.
Iakoba poraie nina man·gen: M’laya Games 2024: U-18 me•chikrangni robol kal•susaanio Ri Bhoi final-ona doanga
Watch
