Tura, Feb 14: Ru·utgijan Garo Hills Autonomous District Council (GHADC)na pu·onaniko ong·atangna mikkang-mikkang, mija Sonibar salo Rongandigre Walkasin Resort-o tom·aniko ong·atenba Garo Hills-o a·joltangni gital political dol Bharatiya Party Loktantrik (BPL)-ko bikotaha.
Ia gital political dolko India-ni jeba bakrango dongenggipa a·joltangni gipin political dolrang baksa nangrime BPL-Garo Hills Chapter ine dolni bimingko donaha.
Iani bidingo gital political dolni dilgiparangni u·iatani gita, Garo Hills-o niksengbatgipa dolgni political dolrang Congress aro NPP, Garo Hills Autonomous District Council (GHADC)ni Executive Committe (EC) ong·e kam ka·anirango A·chik a·songna maming namroro-silroroanirangko ra·bana man·gijaniko manderang mikrontangchi nika aro ma·sia.
Unbaksana, GHADC-o kam ka·enggiparangna bilsi-gni batpile dormaharangko on·na man·gijani a·sel NPP-ni EC-rang administrator-na pakwate on·na ga·akaha, apsandake administrator-ba GHADC-o kam ka·enggiparangna ja 30 batpile dormaharangko on·na man·chipjaha, indakpilgipa obostarang GHADC-o ong·enga ine parakataha.
Una agreba, GHADC-ko namroro-silroroatna ma·mong sorkarini on·atgipa tangka-paisa gong kror 100.71 -rangko maming kamko ka·gija EC-rang bon·ataha ine parakatenba, Garo Hills-o ia nangchongmotgipa aro mongsonggipa kamrangko ka·na gitade a·joltangni political dol UDP-an gittamgipa baseani chol ong·enga. Uni giminsa ia gitalgipa dolko bikote kamrangko ka·angna miksongani Garo Hills-o gittamgipa baseani chol ong·a ine dolna gital seokako man·gipa BPL-Garo Hills Chapter-ni General Secretary Chesrang M. Sangma koborna seachi u·iataha.
Indake ong·engon, ia gital political dol BPL-Garo Hills Chapter-ko bikotani ja·mano dolni gital dilgiparangkoba seokangjolaha, uamangara – President-na Lindin Ch. Momin aro General Secretary-na Chesrang M. Sangma ong·a.
Garo Hills-o bikotdaldalgipa a·joltangni gital political dolan re·baenggipa GHADC-na pu·onaniko ong·atenggipao Garo Hills-ni bang·a seat-rangon susae EC-rangni akkal-karap ong·atgipa GHADC-ko naljokatgen aro GHADC-ko name rikpiltaina kamrangko ka·gen ineba dolni general Secretary parakatjolaha.
