Tura, July 1: Robibar pringonin Garo Hills gimikon mikkarang dontonggija waanganichi a•arang be•e, badiaba badiaba biaprangode rama jal•langrang champengatako man•aha aro badiaba badiaba biaprangode nok-jamrang nosto ka•ako man•angtokaha.
West Garo Hills a•jani Deputy Commissioner Jagdish Chelani-ni Hub News-na u•iatani gitade, Tura-ni Upper Chandmary gittimo nok te•sa aro Deran Gittimo nok te•sako a•arang rurongdapaha.
Robibar pringonin mikkarang dontonggija waangahani a•sel Tura songjinmani bang•a biaprangon a•a be•anirangko nikna man•aha ineba Chelani parakataha.
Da•o dipet West Garo Hills a•jani a•kawe jolrango chirang bang•e bankujaenga indiba Selsella Block-ni song damsao chi banna a•bachengaha ineba ua aganaha.
Deputy Commissioner-ni parakatani gitade, Selsella Block-ni Sankapara songo chirang bane, manderangni nokrango chirang napahani gimin manderangko donchakna gita sorkari skulrangko relief camp dake kuliataha.
Tura songjinmao a•arang be•anichi Dobasipara-o donggipa bus station kosako mongsonggipa ramako champengataha aro unbaksana Chitoktak aro Gandrak-ni gisepo donggipa ramakoba a•a be•dape mitam bakrangko champengataha.
Upper Chandmary gittimo, North Tura-ni gitcham MLA Noverfield Marak-ni nok bagan kosakoni ro•ongrang rurongbae, katcha nok te•sako aro ua biapo park ka•e donenggipa garirangko be•dapeaha.
Deran Gittimoba a•arang ruronge, saksa Ramen D Sangma minggipa mandeni nokko be•dapaha.
Na·simang ia video-koba nina man·gen:
Na·simang iakoba poraina man·gen: State Shooting Championship-o EKH chea, gnigipa biapko WGH man•a
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
