Tura, Feb 5: Kamrup district-ni ning·o donggipa Rajapara song gita Garo Hills-ni bolrangko cha·ue gipin biapchina walni somoirango srik-srik salangenggipa Mahindra pick-up gari bolsako A·chik Holistic Awakening Movement (AHAM), Rajapara Unit mija Butbar walo rim·rikaha.
Iani bidingo koborna seachi u·iatanio, walni somoio bolrangko cha·ue gipin biapchina ra·angmitingo gariko North Garo Hills aro Assam-ni sima-ari jolo rim·soaha ine u·iatenba, ua somoio AHAM-ni manderangko nikdike bolrangko cha·ue salbaenggipa manderang an·tangtangni bol salbagipa gariko rang·san dongale kataha ine AHAM, Rajapara Unit-ni padot Raksim R. Marak agan-talataha.
Uamangni rama tong·sao rim·rikgipa gari aro bolrangko ja·mano Assam-ni Forest Department-na pakwatataha ineba AHAM-ni dilgipa Raksim Marak koborna seachi u·iatdapaha.
