Tura, March 12: GHADC eleksino gipin jatrangni bak ra·ani bidingo adita salrangna skang warachakgipa dolni dilgipa aro Meghalaya-ni skotong minister gitcham Dr Mukul Sangma-ni agananggipa kattako ra·chakna man·jae New Tura Development Forum (NTDF), Sukrobar salo jegalataha.
Gimikon man·chapatani gnang Pa Mukul Sangma-ni agananggipako raken jeatengon, GHADC-o mangmang uamangni bak ra·anikosa ra·chakna man·ja maina GHADC-ara A·chikrangna, A·chikrangni aro A·chikrangchi rikgipa ong·a ine janapatenba, gipin jatrangnaba Garo Hills a·jao pilak man·anirang aro cholrang donga kakketkon chu·onga gita on·manaha aro iarang gimikkon A·chik jatrang uamangna ka·sachake maming mikneng-mikbua grian on·tokaha ineba forum janapatkuaha.
“Garo Hills a·jao songdongrimenggipa gipin jatrang baksa A·chik jatrang da·alona kingkingan meli-nangrime aro maming kajia-gri tom·tomen dongrimbaenga. Indide, Garo Hills-ni manderangoniko maidakgipao man·chapataniko MLA da·o nangnikengkua? ineba forum sing·doangaha.
Gipin ADC-rangode, jekai Khasi aro Jaintia a·jao songdongkamgipa a·jatangni manderangni man·gni bilrangko Sixth Schedule-ni niamrangchi bilaken chelchakaniko on·aha aro ua niamrangko uamang raken ja·riktokenga ineba forum taldapatkuaha.
“KHADC aro JHADC-rangode gipin jatrangko bak ra·na gita on·ja, uni gimin KHADC aro JHADC-rangko gitan GHADC-koba apsan chanako seoke watatako man·gipa dilgiparango Garo Hills a·jao songdongengggiparang ka·dongchakenga. Eleksinni mamlao aro gipin administrative mamlarango apsan a·dokoni ong·eba maidake Autonomous District Council (ADC)rang dingtanggrikna nanga?” ine sing·doangtaienba, a·jatangoni manderangko chelchak-nirokna gita manderangni seoke watatako man·gipa MLA-rang minister-rangni kaman ong·achim ineba forum parakataha.
Indake ong·engon, adita salrangna skang dakchakgipa skotong minister aro warachakgipa dolni dilgipa Dr Mukul Sangma-mangni ra·chakna man·gijagipa kattarangko agananganio Garo Hills a·jani seoke watata man·gipa dilgiparangoni saksaba uamangni kosako maming ku·sakoba agangija ku·gri dake dongtokanina suk ong·gijaniko parakatan baksa, re·baenggipa April jao GHADC-na pu·onatanio gipin jatrangko susana on·aniko ra·pilchinaba dingtang dingtang political dolrango forum, dingtangmancha mol·molatjolaha.
