Shillong, April 20: Adita salrangna skang ong•atanggipa Garo Hills Autonomous District Council (GHADC) election-na campaign-ko ka•anio bang•bata political dolrangan COVID-ni niamrangko ja•riktokjaha ine manderang matnangtokahani gimin election-na campaign ka•anichi Garo Hills-o COVID-ko giproroatjaha ine Mongolbar salo Meghalaya a•dokni Deputy Chief Minister Prestone Tynsong, talataniko on•angaha.
Da•o dipet Garo Hills-o inditana COVID gipkujaenga ineba Tynsong talataniko on•angaha.
Deputy Chief Minister-ni aganani gitade, da•o dipet Garo Hills-o COVID man•giparang bang•brekujaengoba a•doko da•o obostarang namjabatrorobaenga aro ia sabisini giproroaniko champengna gita ja•kurangko de•na nangengaha.
Shillong jolosa da•o COVID man•giparang batrorobaenga ine janapatengon, da•o dipet Meghalaya a•dok gimiko COVID man•e dongenggiparang sak 857 gapengaha aro ianoni sak 618-de East Khasi Hills a•jao ar sak 14-de West Garo Hills a•jao ong•enga ine Tynsong parakataha.
