Tura, March 19: Ia chang Garo Hills Autonomous District Council (GHADC) election-oba susana gita Betasing GDC constituency-ni MDC ong•enggipa Nripendra Koch, adita salrangna skangan an•tangni nomination-ko file ka•manahaoba nomination-ko ra•pilani bon•kamgipa salo, ua an•tangni nomination-ko ra•pilskaaha aro ian una kam ka•enggipa manderangna jagokman•pilani gita ong•aha.
Nomination-rangko ra•pilna gita Sukrobar salkon bon•kamgipa sal dake donsoahachim aro ia salo Betasing-ni MDC baksana South West Garo Hills a•jani Zikzak constituency-o susana nomination file ka•gipa Independent candidate Abdus Sattar aro West Garo Hills a•jani Raksamgre GDC constituency-o Garo National Council (GNC)-ni candidate ong•e susana nomination file ka•gipa John Pillar A Sangma-ba an•tangtangni nomination-ko ra•piltokaha.
South West Garo Hills a•jani Deputy Commissioner aro Returning Officer Ch Ramakrishna-ni u•iatani gitade, South West Garo Hills a•jao gimik sak 24 candidate-rang GHADC election-o susana nomination-rangko file ka•ahachim indiba da•o candidate sakgnide an•tangtangni nomination-ko ra•pilahani gimin da•o sak 22 candidate-rang susaangskagnok. South West Garo Hills a•jao dambri MDC constituency-rang gnang aro uaranga Nogorpara, Boldamgre, Betasing aro Zikzak constituency-rang ong•a.
South, North aro East Garo Hills a•jarangode nomination-rangko ra•pilgipa candidate-rang dongskajaha.
