Tura, March 15: Re•baenggipa April jani 12 tariko ong•atna sienggipa Garo Hills Autonomous District Council (GHADC) election-o Garo Hills gimikoni sak 185 candidate-rang susana gita chu•gimik tarimanaha.
Ia GHADC election-na nomination-ko file ka•ani Sombar attamni 3:00 bajio matchotangaha aro Sombar attamona kingking gimik sak 185 candidate-rang, an•tangtangni nomination-rangko file ka•angaha. Candidate-rangni lekkarangko apsan salni 3:00 bajini ja•man nipilanagaha (Scrutiny) aro nomination file ka•giparangoni darangba official-rangni jegalako man•jaha.
GHADC election-na nomination-ko file ka•ani bon•kamgipa salo saksku candidate-rang West Garo Hills a•jao an•tangtangni nomination-ko file ka•angaha aro ia saksku candidate-rangoni sakgnide me•chikrang ong•a.
Ia sakgni me•chik candidate-rangoni saksade, 2018 bilsini Assembly election-o Rangsakona Assembly constituency-o Independent candidate ong•e susagipa Dr Pilne A Sangma, jean ia chang GHADC election-o Tura GDC constituency-oni United Democratic Party (UDP)-ni candidate ong•e susaskagipa ong•e ong•enga aro sakgipinde da•o Selsella-ni MLA ong•enggipa Ferlin CA Sangma-ni demechik Ruth Tamera A Sangma, jean Batabari GDC constituency-oni Independent candidate ong•e susaskaenga.
West Garo Hills a•jao GHADC-ni gimik dam 13 constituency-rang donga aro ia dam 13 constituency-rango gimik sak 90 candidate-rangna susana sienga.
Sombar salona kingking East Garo Hills a•jaoba GHADC-ni dam gittam constituency-rango susana gita gimik sak 16 candidate-rang, nomination-ko file ka•aha.
North Garo Hills a•jao GHADC-ni Rongrong, Bolsong aro Damas constituency-rango susana gita gimik sak 23 candidate-rang, nomination-ko file ka•skaaha.
South Garo Hills a•jao GHADC-ni dambonga constituency-rang donga aro ia consituency-rango susana gita gimik sak 32 candidate-rang, nomination-ko file ka•skaaha.
South West Garo Hills a•jaoba, GHADC-ni Zikzak, Boldamgre, Betasing aro Nogorpara constituency-rango susana gita gimik sak 24 candidate-rang, nomination-rangko file ka•aha.
Ia chang GHADC election-o mingsa aiao inmananide, da•o ong•enggipa sak 29 MDC-rangoni sakgnide susapiltaijaenga aro uamangara Tura-ni Independent MDC Rupert M Sangma aro Batabari-ni Independent MDC Mark Goera B Marak ong•a.
GHADC-na gital dilgiparangko re•baenggipa April jani 12 tariko Garo Hills-o songdongenggipa manderang, sikdepe seokanggen aro ia election-ni result-rangko April jani 15 tariko parakatskana sienga.
