Tura, April 12: Sombar salo GHADC-ni dam 29 constituency-ni gital dilgiparangko seokna pu•onani da•o dipet 69.42 percent gapaha indiba West Garo Hills a•jani a•kawe jolrango waltingonan pu•onkuengani gimin ja•mano pu•onani percentage batangkunaba gnang ine official-rang parakataha.
GHADC election-o Tribal ong•gijagipa manderangni bak ra•paaniko jegale dingtang dingtang dolrang jingjengatanirangko dakahaoba Tura-o aro West Garo Hills a•jani a•kawe jolrango gipin jatrang bang•en pu•onanio bak ra•angtokskaaha.
Meghalaya a•dokni Chief Minister Conrad K Sangma-ba Sombar pringnian Tura-ni Walbakgre polling station-o gipinrang baksa apsan pu•onpaaha aro Congress dolni dilgipa Mukul Sangma-ba an•tangni jikgipa aro Mahendraganj-ni MLA Dikkanchi D Shira baksana an•tangni demechik aro Ampati-ni MLA Miani D Shira baksa Ampati-ni Chengkompara polling station-o pu•onangskaaha.
West Garo Hills a•jao dam 13 MDC constituency-rang donge, attamni 4:00 bajio pu•onaniko dontongataona kingking chu•gimik pu•onani 65 percent ong•ahachim indiba a•kawe jolrango walonan pu•ongiparang pu•onna gita senge dongkuenggiparang dongani gimin ja•mano pu•onani percentage batangkunaba gnang ine ka•dongsoenga.
Attamni 6:00 bajiona kingking Raksamgre GHADC constituency-o pu•onani da•o dipet 48.13 percent ong•e West Garo Hills a•ja gimiko komibatsranggipa ong•aha aro Babelapara constituency-o 89.96% ong•e a•jao bang•batgipa ong•skaaha.
Rochonpara constituency, jeon GHADC-ni CEM aro NPP-ni candidate Dipul Marak, susataiengachim, ia biapo pu•onani 72.70 percent gapskaaha.
GHADC-ni chairman ong•enggipa aro NPP-ni candidate Denang T Sangma-ni Williamnagar constituency-o pu•onanirang 58.8 percent-san ong•skaaiaha.
East Garo Hills a•jani Deputy Commissioner Swapnil Tembe-ni u•iatani gitade, East Garo Hills a•jani damgittam GHADC constituency-rango chu•gimik pu•onani 70 percent batna ka•dongenga.
Sombar attamni 4:00 bajiona kingking Garo Hills-ni dambonga a•jarango pu•onani percentage-ara South Garo Hills-o 76.24%, West Garo Hills-o 64.51%, South West Garo Hills-o 76%, East Garo Hills-o 62.2% aro North Garo Hills a•jao 70 percent ong•aha.
