Williamnagar, Feb 26: Re·baenggipa April 9 tariko Garo Hills Autonomous District Council (GHADC)na pu·onaniko ong·atnasienggipao gipin jatrangni susaapaniko jegale East Garo Hills a·jani nangrimgimin dingtang dingtang NGO-rang jekai – GSU, FKJGP, AAYF, AYC, FAF, AIGU, ASWA, Mothers Union, Mothers Federation, College Students Union, Auto-taxi, Sumo Pickup Association-rang, Club-rang, songni-nokni dilgiparang, Nokma-sordarrang aro a·gipi songdongkamgiparang Sukrobar salo Williamnagar, Rongrenggre kal·chakram biapo tom·ani ja·man jinma re·jomaniko ong·ataha.
GHADC-ni eleksino gipin jatrangna political dolni tikit chamaniko aro susaaniko bilake jegalsona gita East Garo Hills Joint Action Committee (EGHJAC)ko songaha aro iano uamangni namnikgijaniko mesokna Sukrobar salo jinma re·jomaniko dakangaha.
Ia dolko bikotani miksonganiara, re·baenggipa GHADC eleksino susana gita dingtang dingtang political party-rangni gipin jatrangna tikit chamaniko jegalsona gita a·jani bang·a NGO-rang gimik nangrime gital bimango EGHJAC dolko bikotaha ine dolni padot Saljrang Tengrik R. Marak koborna seachi u·iataha.
“Maming saloba gipin jatrang, a·bri jolni manderangni District Council-na pu·onatanio susana aro bakko ra·na man·ja, GHADC-ara A·chik jatnisa aro A·chik jatni Niam-Sunduk-sa ong·a, uni gimin gipin jatrang iano nape kam ka·na bil dongja aro a·bri-a·kong jolni manderangko sason ka·na man·chongmotjawa” ine Sukrobar salo jinma tom·anio jegalgrimtokaha.
Hai an·ching re·baenggipa GHADC eleksino gipin jatrangko susana on·jana, aro je doloniba tikitko on·china uko ra·galpilna nanga, A·chikskanasa tikitko chamna nanga ine jinmaan dabiange, ia re·baenggipa eleksino susana tikit man·gipa gipin jatrangko nomination file ka·na on·jawa ine mikrakatenba jatna kam ka·anirango hai an·ching ku·cholsan ong·e bakrimna ineba EGHJAC-ni dilgipa ku·mongrimangaha.
