Tura, March 11: All Garo Hills Joint Action Committee (AGHJAC), East Garo Hills Joint Action Committee (EGHJAC), Niksamso A·chik Society (NAS) aro gipin dingtang dingtang NGO-rang bakrime, re·baenggipa April 12 tariko ong·nasienggipa Garo Hills Autonomous District Council (GHADC) eleksino gipin jatrangni susaaniko jegale Bristibar salo Tura-o jinma re·jome namnikgijaniko mesokangaha.
Nangrimgimin AGHJAC, EGHJAC aro gipin NGO-rangni jegalanganio, GHADC eleksino gipin jatrangna party tikit on·giminko ra·galpilchina aro nomination file ka·aniko dontongatchina jinma chrik-a·boke dabiangtokaha.
Gipin jatrangna party tikit on·giminko ra·galpilkuja dipet AGHJAC, EGHJAC aro gipin NGO-rang Sukrobar saloni March 15 tarik, Sombar salona Garo Hills gimikon poster campaign-ko ong·atangan baksa gipin jatrangni nomination file ka·aniko champengatgen ine NGO ni dilgiparang Bristibaro koborna parakaha.
Unbaksana, Sukrobar pring 5 bajioni attam 5 bajiona re·baenggipa Sombar salona Garo Hills gimikon gipin jatrangni re·ruaanirangko rama champengatgen, indiba A·chikrangni re·ruraenggipa gari-gorarangkode mamingchiba champengjawa ineba koborna parakatkuaha.
Indake ong·engon, AGHJAC adita salna skang West Garo Hills-ni DC office mikkango asonge jingjengataniko dakna gita tik ka·ahachim, indiba Deputy Commissioner, uamangni asonge jingjengatna miksonganiko champengahani gimin Bristibar salo Tura Willam Point-o jinma tom·dake re·jomaniko ong·atangskaaha.
