Tura, March 13: Garo Hills Autonomous District Council (GHADC) eleksino a·songni political dolrangni tikito susana tarienggipa gipin jatrang jemangan party tikit man·ahachim aro unbaksana jakgitelo susaenggipa candidate-rangni nomination file ka·aniko ra·galpilchina dabienba All Garo Hills Joint Action Committee (AGHJAC), Sukrobar salo Chief Election Commissioner-na lekka sedoataha.

Iani bidingo AGHJAC-ni dilgipani koborna parakatani gita, a·songni niam-bidiko pangchake Sixth Schedule-na on·gimin niamrango janapani gitade gipin jatrang maming dakeba Sixth Schedule a·jarango susaatanio chakatna aro bak ra·na man·ja ine janaptenba, a·bri jolo songdongenggipa tribal manderangna dingtangmancha bil on·gimin a·jao chong·motan GHADC eleksino gipin jatrang maikai susana man·aha? ine AGHJAC-ni Convenor Te Balkarin Ch. Marak sing·doangaha.

Indake ong·engon, Sixth Schedule-ni niamrango pangchake gipin jatrangni GHADC eleksino susana nomination lekkako on·anganiko ra·chakjachina aro nomination on·giminko ra·galpilchina dabie AGHJAC, Chief Election Commissioner-na chitti seatgipao mol·molataha.

Janapjolna gita, mikkang jao ong·nasienggipa Garo Hills Autonomous District Council (GHADC) eleksino a·songni political dolrang jekai BJP, NPP aro Congress dolrang gipin jatrangna susachina gita tikitrangko on·angaha.