Tura, March 15: Re·baenggipa Aprilni 12 tariko ong·atnasienggipa Garo Hills Autonomous District Council (GHADC) eleksino gipin jatrang bak ra·e susaaniko jegale namnikgijaniko mesokna East Garo Hills a·jani NGO-rang Sombar salo motorcycle sale rally-ko ong·atangaha.
East Garo Hills a·jani nangrimgimin dingtang dingtang NGO-rang, gipin jatrangni GHADC eleksino bakko ra·e susaengani gimin jegale Rongjeng-oni Williamnagar gita Tura-ona bike rally-ko ong·ataha.
GHADC eleksino gipin jatrangni bakko ra·e susaengani gimin NGO dilgiparangni agananio, GHADC-ara A·chik jatnisa ong·a aro gipin jatrang ia eleksino maming dakeba bakko ra·na man·ja, GHADC-ara a·bri jolo songdongenggipa tribal manderangna dingtangmancha on·gimin Sixth Schedule ong·a, aro NGO-rangni champengako manigija maina eleksino susae A·chikrangni tom·tome janggi tanganiko kajia a·botenga? ine sing·doangaha.
“Da·alo chinga NGO-rang mangmangsan jegalaniko dakenga, indiba A·chik jat sakantian ma·sina nanga aro ku·mongna nanga. Chingni da·alo gipin jatrangni GHADC eleksino bak ra·aniko jegalanio A·chik jat pilakan chakatna nangachim, uni gimin pilak A·chik ma·gipa-pagiparang, jong-ada, no-abirangko mol·mola aro ia A·chik jatni namgnina A·chikrangni gamchatgipa GHADC-ko name ripingna ku·monge jak on·pana nangchongmota” ine GSU-CEC-ni padot Zikku Balgra N. Marak didianiko on·angaha.
“Da·alo chinga pilak political dolrangnan ia u·iataniko on·enga, chong·motan a·dok sorkari ia chonbegipa A·chik jatko chel·chakna nangchongmota aro gipin jatna party tikit on·na nangja, uni gimin party tikit man·e susaenggipa gipin jat candidate-rangna vote pu·onna skang changni-chang chanchichengchina,” ineba GSU dilgipa agandapangaha.
GHADC eleksino chakatna ba susana party tikit on·gipa political dolrangko chinga raken jegala, indiba eleksino chee re·baode NGO-rang uamangko GHADC-o asongna on·jawa ine mikrakatenba, GHADC-de A·chik jatnisa gipin jatrangni ong·ja ineba NGO-rang janapatkuaha.
