Tura, Dec 14: Garo Hills Autonomous District Council (GHADC)-o kam
ka•giparang chongmotan employee-rang bilsigni jachetna kingking
dormaha man•jaengani gimin GHADC-o kam ka•enggipa employee-rang Non
Gazetted Employees Association (NGEA)-ni dilachi Sombar salo
tom•bimonganiko GHADC office mikkango ong•atangaha.
GHADC employee-rangni mongsonggipa chanchianiara Krismas-ni somoio
uamangna jasani dormaha gitcham free pay revise-kosan on•na am•engani
gimin jinma jegale, jasani dormahako ra•jawa ine tik ka•angaha aro
uamangni dabia gita jagittamni gital pay revise-ko on•na nanga ine
dabiangaha.Gnigipao GHADC-ni Secretary Ma Rikse R.Marak-ko ra•galna
nanga maina uni GHADC-o Secretary ong•chengaoni da•alona indakgipa
neng•nikaniko man•enga ine jinma jaksi otaha, uni gimin una sal 2
somoiko on•angaha, ua salgnini ja•mano GHADC-ni Secretary-ko wate
re•angchina December 16 tariko bon•kame somoioko on•na gita lekka
sedogen ine jinma tik ka•angaha.
GHADC-o kam ka•enggipa employee-rangna gital pay revise ia bilsini
April jaon sokahachim, indiba da•alona kingking GHADC-ni administrator
employee-rangna gitcham pay revise-kosa on•kuengani gimin GHADC-ni
employee-rang namnikgijaniko jegale, uamangna gital pay revise-ko
on•china raken dabiangaha.
Tom•anio NGEA-ni dilgiparangni jinmana parakani gitade, Jal Jeevan
Mission-ni gita GHADC-o kam ka•giparangna dormaha on•china krol 18
tangkako on•atahani kusi ong•achim. Indiba ua tangkako dormaha on•gija
jasani gitcham pay scale-ko on•aniko ra•jawa ine jinma jegalangaha.
NGEA dilgiparangni parakatani gitade GHADC-o kam ka•enggipa staff
employee-rang sak 1704 gnang aro jaanti dormaha on•na nanga gitcham
pay scale-o krol 3.69-rangko nanga, indiba GHADC authority-rangde krol
4 bate nanga ine aganskaa. Indake ong•engon gital pay revise-ode
tangka gong krol 7 bate nanga ine aganenga, indiba chingni sandie
hisap ka•e ma•siani gitade gital pay revise-o krol 4.88-san ong•aia,
indiba uko round pigure-o krol 5-ko donatenga ine aganangaha. Uni
gimin tangka gong krol 18-ko employee-rangna jagittmani dormahako
on•genchimode krol 15-san ong•aia, tangka gong krol 3-de gitchakuenga,
unbaksana GHADC-ni gipin fund-rangko man•ode una batgenchim, indiba
da•o man•kujaenga ineba aganangaha. Uni gimin employee-rangna
Krismas-ni somoio jagittam mangmangni dormahako on•genchimode
employee-rang namen kusi ong•genchim ine NGEA dilgipa aganangaha.
Indake ong•engon GHADC office-ni dingtangdingtang branch-rang aro
department-rangoni darangba gitcham pay scale-ko tarijachina,bill
tariode gital pay scale-ko tarichina gitaba didiangaha. Maina indaita
bilsina chongmotan ja 32-ko hisap ka•ode bilsigni jachet dormaha gri
duk mikchi ong•e, cha•a ringa gri GHADC-ni employee-rang kamrangko
ka•aha aro badiaba employee-rangde an•tangtangni dormahako
man•chipgija siangaha, indiba employee-rangni dukko GHADC-ni
authority-rang ma•sichakja ineba jinma matnangaha. Indide GHADC-ni
authority-rang mandena ka•sachakani gisik dongama ine employee-rang
sing•doan baksa suk ong•gijaniko parakangaha. Uni gimin GHADC-ni
employee-rang NGEA baksa ku•monge mikkangchi rakbate kamrangko
ka•angna gita jinma tik ka•angaha.
Unbaksana GHADC-o ong•enggipa obostarangko namdapatna miksonge NGEA
mikkangchi minggni ja•ku de•aniko dakdapanggen ine aganaha, skanggipa
Finance Rules aro gnigipa Service Rules-ko GHADC-o ra•gatna nanga,
Finance Rule dongjani a•sel GHADC-o tangka paisani gimin ma•sija,
tangka paisarangko maidake man•baenga aro ua tangkarang bachi gimaenga
uarangko ma•sina nanggen, jeoni fund-rang sokbaoba NGEA-ni
dilgiparangna order lekkarangko mesokna nanggen ine NGEA dilgiparang
jinmana parakangaha.
