Tura, Dec 21: Garo Hills Autonomous District Council (GHADC)-o kam ka•enggiparangna jagnini dormaharangko on•na gita ku•rachakanio kam ka•enggiparangoni bang•batan an•tangtangni dormaharangko ra•na tarihaoba kamrangko ka•gija dongahani gimin Accounts department-ni sakdok manderangna, GHADC-ni Secretary, show cause notice-ko on•angaha ine kobor on•aha.
Krismas aro Bilsi gitalko maniani somoio ja 29-ni dormaharangko man•tokkujaengani gimin GHADC-o kam ka•enggipa manderang re•anggipa antionin kamtangtangko dontongaten jingjengatanirangko daktokengachim ine nikna man•a.
Indake ong•genchimoba, GHADC-o tangka paisarang dongsrangjaengani a•sel kam ka•giparangna gitcham pay scale-o pangchake da•o jagnini dormaharangkosan on•na man•aigen ine GHADC-ko chalaienggipa administrator-ni parakatani ja•mano, kam ka•enggiparang manderangoni bang•batan dormaharangko ra•na nangniktokaha aro mitamrangsan ia dormahako jegaltokenga ine kobor on•aha.
GHADC-ni secretary Rikse R Marak-ni u•iatani gitade, Sombar salo ua jingjengatenggipa manderang baksa agangrikenba, jagnini dormahako ra•china didiangon, kam ka•giparangoni bang•batan jagnini dormahako ra•na gita kusi ong•ahachim indiba ia tom•ani ja•mano nangchongmotgipa kamrangko ka•na nangenggipa Accounts department-ni sakdok manderang, kamtangtangko ka•gija gimaahani gimin ia sakdok manderangna show cause notice-ko on•angaha.
Kamtangtangko ka•gija dongahani gimin show cause notice-ko man•gipa Accounts department-ni sakdok manderangara cashier Jullerdro A Sangma, cashier Hunterson P Sangma, assistant cashier Balin M Sangma, LDA Rengmin S Sangma, cash assistant Sthin A Sangma aro office peon Saljrang R Marak ong•achim ineba u•iataha.
