Tura, March 29: Garo Hills Autonomous District Council (GHADC)-ni chief executive membor (CEM) ong•enggipa Dipul R Marak-na Sombar salo, Meghalaya a•dokni Chief Minister aro National People’s Party (NPP)-ni national president Conrad K Sangma, Garobadha, Selsella aro Kalchengpara-o campaign ka•angaha aro ia GHADC election-o NPP-ko seokchina gita jolo songdongenggipa manderangko didiangaha.
Ia GHADC election-oba NPP-ni candidate Dipul Marak, Rochonpara GHADC constituency-oni susataiengachim ine nikna man•a.
Garobadha, Selsella aro Kalchengpara-o NPP-ni candidate-na campaign-ko ka•angengon, GHADC-ni CEM Dipul Marak, doltangna kakket ong•gipa aro an•tangni constituency-ni manderangna ka•sae dangdike on•na sikgipa mande ong•a ine Chief Minister Conrad Sangma aganangenba, ia election-o Dipul Marak-ko seoktaipilchina gita jolo songdongenggipa manderangko didiangaha.
“NPP-ko bikotdile on•chenggipa chingni pagipa PA Sangma sagi baksaba Dipul Marak, kamrangko ka•rimmanaha aro ua NPP-na aro manderangni namgnina an•tangko on•kangaha. Council-ko tangatpiltaina gita ua rakbee kamrangko ka•engani gimin ia changoba ua seokako man•piltaina krachongmota,” ine Sangma aganaha.
Dipul Marak saksa cholon bewal namgipa aro kam changgipa dilgipa ong•e, songsalna an•tangni daitoko ma•gipa mande ong•a ineba NPP-ni national president aganaha.
Ia tom•anirango NPP-ni candidate Dipul Marak-ba manderangna aganprakengon, uni CEM ong•engmiting somoio uamang council-ko namdapatna gita dingtang dingtang kamrangko a•bachengataha ine ia chang election-oba an•tangni seoktaipilchina gita constituency-tangni manderangko didiangaha.
