Tura, May 17: Raksamgre Civil Sub-Division-ni ning·o ga·akgipa Hatogaon aro Rongsai song jolrango Assam-oni manderang napdrabae niam gri songdongengani gimin, GHADC-ni dakchakgipa CEM, Pa Nikman Ch. Marak-na lekka sedoatani ja·man Garoland State Movement Committee (GSMC) Pedaldoba Unit aro Meghalaya Rabha Jatio Sewa Sangha (MRJSS) dolgni nangrime May 17 tarik Sombar salo ua biaprangona re·ange sing·sandianiko dakeaha.
District Council-ni Land and Revenue officer, Raksamgre Civil Sub-Division-ni SDO in-charge Ma Leena Daring aro SDPO, Pa Challang Momin aro gipin NGO-ni dilgiparangni re·chapanganio, Pa Nikman Marak, uni EM sakgni Pa Dhormonath Sangma aro Pa Nathawal S. Marak-maang baksa biapona re·ange Hatogaon songni Gaonbura aro manderangko okame iani bidingo sing·sandiangaha.
Uni sing·sandianiko dakon, B-Mohal biapo a·a patta donggipa Rabha saksa an·tangni biapko niam gri dake Assam-ni manderangna ge·bri dokanrangko para on·e cha·engachim aro dokan dakenggipa manderangba uno dongkamesa dakengachim ine nikna man·aha.
GHADC, ua Rabha-na a·pal game cha·china aro bagan-bari dake janggi tangchinasa B-Mohol A·kingo a·a pattako on·aha, niam gri Assam-ni manderangna dokan para on·chinade ong·ja ine dakchakgipa CEM Pa Marak agan-talataha.
Indake ong·engon, dokanko para on·aniko ra·pilchina gita ua Rabha-na sal 15, chong·motan re·baenggipa June 1 tarikona somoiko on·e, sal 15-ni gisepo dokan para on·ako ra·pilja ong·ode, district council uni a·a pattako den·galgen ineba mikrakataha.
“Na·a an·tang dokan dake cha·bo, gipin a·dokni manderangna maina niam gri para on·na nanga? Mikkangchi ia jolo songdongenggipa manderangna namen kenchakani ong·enga, uni gimin da·onin simsaksona nangenga” ineba Pa Marak ua mandena agandape donangaha.
