Tura, April 11: Garo Hills Autonomous District Council (GHADC)-ni gitcham deputy chief executive membor aro Silkigre GHADC constituency-ni GNC candidate Augustine R Marak-ko Robibar attamo, South Garo Hills a•jani Chokpot jolo donggipa Emangre songo, tangka sualengmitingko nikdikenba songni manderang jinma chadrapaha ine kobor on•aha.
Kobor on•timgiparangni u•iatani gitade, Robibar attamni 6:00 bajimango Augustine, an•tangni manderang baksa Mahindra Scorpio gario Emangre songona re•angenba, election-o an•tangna pu•onchina ine manderangna tangkarangko sualengachim. Election-ni dongimin niamko pe•e uni iandake tangka sualanina songni manderang uko beng•on uni manderang, songni manderang baksa nanggrikna a•bachengaha aro uandaken ja•mano songni manderang jinma Augustine aro uni manderangko chadrapna a•bachengaha.
Songni manderang jinma uamangko chadrapon uni garide bilongbee nosto ka•ako man•aha indiba ua rasong gnange songo donggipa polling station ning•chi katnape jokna man•aha ine kobor on•timgiparang parakataha.
Election-na campaign ka•ani somoi Sonibar attamni 4:00 bajion bon•ahachim indiba ua election-na dongimin niamko pe•e, an•tangni constituency-ni ning•o donggipa dingtang dingtang songrangona wenroroe manderangna tangka paisarangko sualengachim ine jolni manderang u•iataha.
Indake ong•engon, ja•mano police-rangsa ua biapona re•ange Marak aro uni manderangko naljokaniona rimongkatangna man•aha aro ja•mano uamangko sanna gita Chokpot health centre-ona watataha ine kobor on•aha.
GHADC-ni gital dilgiparangko seokna gita Sombar salo Garo Hills-ni manderang pu•ontokna siengachim.
