A·chik a·songni niam sunduk ko rakkienggipa Garo Hills Autonomous District Council opis o kam ka·enggipa rang ru·uta somoi rangonin dormaha gri an·tangtangko jat aro a·songni namgnina on·kange dangdike on·enggipa rang namen neng·sikimako man·roroengani gimin ka·magipa gadango kam ka·enggipa rang Non Gazzetted Employees Association ni bimango ta·raken uamangni ka·gimin kamrangna dormaha ko on·na nanga aro batanggimin Executive Committee ni ra·chakgimin gita bonga gipa pay commission ni gadango dormaha rangko on·na nanga ine kam ka·anirangko dontongate gitalgipa EC ni kosako bilake dabianirangko dakanio uamangni dabiani gitade man·jawa indiba bri gipa pay commission ni gita ja 5 ni dormaha kode on·chenggen , uni ja·mano ja gni ni gisepon adita ja rangni dormaha ko on·taigen aro ka·sne ka·sne on·roroanggen indiba chingko opiso asonge kam ka·na on·chengbo aro na·simangba re·bae ka·ebo ine aganskaani rangna changni chang tom·rimanion meligrikgijanirang donggenoba bon·kame da⋅alo dingtang dingtang NGO ni dilgiparang , torom ko re·dilenggiparang aro u·i ma·sigiparang baksa CEM ni opis kuturio Non Gazzetted Employees Association ni digiparang baksa golporimanirang chu·sokgipa ong·aha. Gisik apale chanchininggipa NGEA ni dilgiparang Executive Committee aro tom·aniona re·bagipa rangni aganani rangko aro molmolani rangko knachake uamangni man·na nangenggipa pilak dormaha rangkon man·na ka·dongsamsoe re·baenggipa 7 June , 2021 sombar saloni kam tangtangko ka·epilgnok ine ku·chakaha. Uni bidingo kobor rangko talbatna inenba NGEA ni Dakchakgipa Jakrikra Mark Flaming B. Marak ko Hub News ni sing·aton ‘gitalgipa EC chingni dabianirangko ka·sne ka·sne ja·ku ga·e chu·sokatgen ine ku·chakaha aro kam rangko ka·chakatna ja gniko somoi on·chengbo ine mol·molaha. Uni gimin chingni dabianirangko chu·sokatchina somoiko on·chenge nienga’ aro ia jagnini gisepo batanggimin somoi-o pilak tangka-paisa ni biding-o selprugiparangkoba sandijolna aganaha ine Marak aganaha.
Uamangni molmolako knachakanina aro gitalgipa EC o ka·donganina CEM Pa. Benedic R. Marak tom·an ja·mano jinmana aganengon jeko uamang man·na nanga ukode chu·gimikkon man·gen aro council ni rongdikona tangka sokbagija selpruanirangkoba Local Audit chi department ge·antikon sandiatgen, jakkalsretani rangko rim·a man·ode darangkoba mikkang nigija bichalona ra·bae gampilatgen, uni gimin ku·cholsan ong·e kam ka·e hai GHADC ni mikkim rasong ko tangchaatpilna ineba Pa. Marak ku·mongaha.
A·chik a·songni manderang jemangan Councilo kam nanengachim uamang 7 June, 2021 sombar sal dipet de a·dok sorkari ni sajinma na dongimin pilak niam rangko ja·rike re·bana man·gnok ineba CEM Pa. Benedic R. Marak Hub News na u·iataha.
Mijalo NGEA ni dilgiparang baksa tom·rime chanchianio chu·sokaniko angna CEM u·iataha ine aganengon Meghalaya ni Skotong Minister Pa. Conard K. Sangma salsa salgnini ja·mano GHADC o pilak kam ka·anirang skango gitan apsan ong·piltaignok ine anga ka·donga ineba janapaha.
