Tura, Sept 6: Garo Hills Autonomous District Council (GHADC)-ni gital MDC-rangko seokaoni skanggipa session-ko Sombar salo a·bachengataha aro ia session-ko a·bachengatanio, sianggimin MDC-rangna kalime mande ra·pilskaaniko dakangaha.
GHADC-ni session-ko re·anggipa jaon ong·atna manchisoahaoba COVID-19-ni a·sel ra·dona gita nangahachim aro uandaken ia salgittamna ong·atenggipa session-ko Sombar sal dipet a·bachengatna man·aha.
GHADC-o kam ka·enggiparangni man·na nangkuenggipa dormaharangko on·kujaengani gimin kam ka·giparang, adita jarangna kamtangtangko ka·gija jingjengatangahachim aro iani a·selba GHADC-ni skanggipa session-ko ong·atningna man·jahachim.
Ia session-ko a·bachengatanio GHADC-ni Executive Committee-ko chalaienggipa aro warachakenggipa dolgnini gisepo maming jera ra·grikanirangko dakgija dolgnian apsan nangrime, ia bilsini gisepo sianggimin gitcham MDC-rangna kalimaniko dakangtokaha.
Ia bilsini July jao COVID man·e sianggipa GHADC-ni gitcham chief executive membor Bimsing R Marak, Tura-ni gitcham MDC aro GHADC-ni gitcham Chairman Locksley Robinhood Ch Momin baksana gipin gitcham MDC-rang, chong·motan Greendas Marak, Admiral K Sangma, Bijon Bihari Rechil, Mrinal R Marak aro Jogonsing D Sangma-ko ia salo, GHADC-ni dilgiparang, gisik ra·e mande ra·pilskaaniko dakangaha.
Ia Session-ko a·bachengatanio GHADC-ni Chief Executive Membor Benedic R Marak, jinmana aganprakengon, sianggimin membor-rangara a·songna aro jatna on·kange kam ka·giparang ong·achim ine parakataha.
Apsan daken, Congress dolni MDC-rang, chong·motan Sadhiarani M Sangma aro Cherak W Momin-ba sianggipa MDC-rangna mande ra·pilskaaniko dakangaha.
“Da·alo uamang an·ching baksa ong·jaha aro ian namen dukni katta ong·a indiba an·ching pilakan uamangni namgipa kamrangko gisik ra·kamgen,” ine Congress MDC-rang parakataha.
