Shillong, Jan 11: Garo Hills Autonomous District Council (GHADC)-na Basic Grant aro Tied Grant-ni ning•o ma•mong sorkarini chame on•atgipa tangka paisarangko kam ka•giparangni dormaharangko on•na jakkalskaaha ine matnanganirangko nikna man•engon, district council-ara an•tangari chalaienggipa bimangsa ong•ani gimin uamangni tangka jakkalani bidingo sorkaride mamingkoba aganna man•jawa ine Mongolbar salo, Meghalaya a•dokni Chief Minister Conrad K Sangma parakatskaaha.
“Kam ka•giparangna dormaharangko on•aniba uamangni daitoan ong•a. Uni gimin tangka paisarangko uamang dormaha on•na jakkalgenchimoba ba namroro silroroani kamrangna jakkalgenchimoba angade mamingkoba aganpana nangani dongjawa,” ine Sangma parakataha.
Indake ong•genchimoba, ia tangkarangara Jal Jeevan Mission-ni ning•o rongtal an•talani aro chirangko sokate on•na miksonge chamatgipa tangka paisarangsa ong•ani gimin gnigipa tangkarangko chamatanio nangchakeaniko man•skanaba gnang ine Chief Minister talataniko on•angaha.
“Ia tangkarangara JJM-na miksonge chamatgipa tangka paisarangsa ong•ani gimin ja•mano nangchakeanirang dongnaba gnang indiba uamang, kam ka•giparangni dormaharangko on•na nangchongmotengahani giminsa ia tangkarangko jakkalsochengahakon,” ine Sangma aganaha.
Chief Minister-ni parakatani gitade, ma•mong sorkarini chamatgipa tangka paisarangna utilisation certificate-rangko on•na man•jagenchimosa gnigipa instalment-rangko man•anio adita neng•nikanirangko chagrongnaba gnang.
Ia tangka paisarangko ma•mong sorkari a•dok gimikni Autonomous Body Joint Fund gitasa chamatahani gimin GHADC-osan ong•aigija KHADC aro JHADC-oba apsan daken gnigipa instalment-ko man•anio neng•nikanirangko man•naba gnang ineba Chief Minister aganaha.
“District council-rang an•tangtangan tangka paisa man•ani cholrangko bikotna nanga indiba iandake tangka paisarangko jakkalaniara district council-rangna biming namgijaniko ra•baani gita ong•a,” ine Sangma aganaha.
