Tura, Dec 17: Garo Hills Autonomous District Council (GHADC)-o kam ka.enggiparang re·anggipa December 14 tariko tom·bimonganiko ong·ate jasani dormahako ra·jawa,ine jegalenba jagittamni dormahako gital pay revise baksa on·china aro GHADC-ni Secretary-ko kam ra·galchina dabiangahachim, indiba a·dok sorkari knachakjaengani gimin uamangni manchisoa gita duk ong·aniko aro suk ong·gijaniko mesokna Bristibar salo GHADC office mikkango asonge namnikgijaniko mesokna jegale jingjengataniko dakangskaha.
GHADC-o kam ka·enggiparangni mongsonggipa neng·nikaniara uamangna ja 32-na kingking dormaharangko on·na man·jaengani gimin nokdangko chalaina, dedrangko poraiatna aro dedrangna skul fee-rangko gamna man·jaengani a·sel GHADC-o kam ka·enggiparangni dedrang skul poraianiko dontongna nangaha. “Ian chingna dal·begipa dukni ong·a, chinga Krismas-ni somoio tangka paisa dongjaoba je cholchiba Krismas-ko manina man·gen,indiba chingni dedrangni poraianirang tangka paisa dongjani a·sel bon·chongdikjok, indita bilsina dormaha man·gija duk mikchi ong·e kamko ka·ani mamuing namgni dongjajok indakgipa dukrangko chinga chagrongna nangaha, iarang gimikan authority-rangni simsakjani a·sel ong·aha. Chingni dedrangba MDC,MLA,Minister aro officer-rangni dedrang gitan poraianio ja·manchakjanaba dongachim, indiba da·alo chongko dukni wario sripataha” ine NGEA-ni General Secretary Brithen M.Sangma suk ong·gijaniko parakataha.
Re·anggipa December 14 tarik-ni attam 2 bajimango District Council Affairs Minister, Lahkmen Rymbui-ni agangipa kattara ra·chakna man·gijani ong·a aro uni kattako chinga raken jegala, ua somoio GHDAC-na krol 18.20 tangkako watatahani gimin indita bilsi chinga dormaha man·gija dongengani gimin ua tangkako dormaha on·naba donga ine ka·dongsoachim, indiba GHADC-o kam ka·giprangna dormaha on·na man·jawa, namrorosilroroatani kamrangnasa ua tangkako jakkalna man·gen ine koborko man·soani ja·mano chinga namen duk ong·tokaha.Battanggimin salrango ong·anggipa minister-rangba apsan kattako aganne GHADC-o kam ka·giparangko chonnika aro on·chepa ineba NGEA dilgipa aganaha.
GHADC-o maini a·sel dormaha on·na man·jaenga, iarang gimikan gitcham MDC-rangni a·sel ong·a aro chinga uamangni kamko raken jegala, uni gimin mikkangchi jeba gital MDC ong·e re·babo A·chik jatni neng·nikaniko ma·sichakgipa, u·ichakgipa aro mandeskana ka·sachakgipa MDC-rangsa ong·na nangen, jedakode uamang A·chik jatni A·king Goreko ripinggipa GHADC-ko name chalaiangna man·gen, uni gimin chinga changsatai authority-rangko, political dilgiparangko aro sorkariko mol·molatenga, December jani gisepo je cholchiba chingna jagittamni dormaha baksa gital pay revise-ko on·pachina NGEA dilgiparang a·dok sorkariko mol·molangaha.
Ia chingni mol·molaniko knachakja ong·ode, chinga knalba,Sombar saloba aro January jaoba chingni dabiako chu·sokatkujana kingking dontonggija jingjengatanirangko dakangkugen aro rakbata ja·ku ga·anirangko dake office-o kam ka·anirangko dontongatnaba donga ine Brithen Sangma parakataha.
