Tura, June 4: Garo Hills Autonomous District Council (GHADC)-o kam ka·enggiparang bilsi gittam ong·na sipile dormaharangko man·kujaengani gimin jabrimangna kam ka·gija jingjengatani ja·man executive committee-ni on·enggipa jabongani dormahako gitcham pay scale-o ra·chakna ku·rachakangaha indiba uamangni man·na nangkuenggipa bangki dormaharangko da·o jagnini gisepon gital pay scale-o on·china niamko donangskaaha.
GHADC-na Meghalaya sorkarini gita dingtang dingtang man·gni kajinarangoniko jabonganiko on·skangsoaniko man·soenba, Sukrobar salo chief executive membor (CEM) Benedic R Marak-ni dilanichi, Non Gazetted Employees Association (NGEA) baksa tom·e chanchirimangaha aro uandaken dolgni chanchirimanichi bon·kamao GHADC-o kam ka·enggiparang jabongani dormahako ra·chake Sombar sal dipet kamtangtangko ka·angpiltaina ku·rachakangaha. Ia tom·anio dingtang dingtang mondolini aro NGO-ni dilgiparangba okamatako man·e bakko ra·angtokaha.
Executive committee-ni on·enggipa jabongani dormahako gitcham pay scale-o ra·na ku·rachakangengon, bangki dormaharangko jagnini gisepon gital pay scale-o on·skachina gita NGEA-ni dilgiparang, ia tom·anio dabiangaha.
GHADC-ni executive committee aro NGEA-ni gisepo meligrikpiltaina man·ahani gimin Meghalaya a·dokni Chief Minister Conrad K Sangma-ba an·tangni kusi ong·aniko parakataha aro mikkangchi GHADC-ko nambatatna gita pilakkon bakrime kam ka·china didiataha.
