Tura, March 3: Chu·gimik ja 31-rangni dormaharangko man·jae neng·nikaniko man·genchimoba kam ka·giparangko batesa onchepe roenga ine matnangenba, Garo Hills Autonomous District Council (GHADC)-o kam ka·enggiparang Butbar salo office-ni napram cholgugao jinma tom·dake GHADC-ni jakrikra Ma Rikse R. Marak-ni kamrangko jegale jingjengataniko a·bachengataha.
GHADC-o kam ka·enggiparangna indita bilsi dormaha on·chipjaenganina re·anggipa February 18 tariko jinma jegale re·jomaniko ong·ataoni kamtangtangko ka·gija da·alona kingking dondikgija jingjengatanirangko dakgenchimoba, a·dokni skotong minister Pa Conrad Sangma-ni knachakjaengani gimin ia jingjengataniko dontongjawa ine NGEA-ni dilgiparang koborna parakataha.
Indake ong·engon, changni chang lekka seeming GHADC-ni jakrikrako kam ra·galchina dabiangoba da·ona kingking kamo dongkuengani gimin mija Sombar salo tom·aniko ong·attaie Ma Rikse Marak-ni kamko jegale namnikgijaniko mesokna tik ka·anggimin gita GHADC office-ni napram cholgugao jinma tom·dake skanggipa salo jegalangtokaha. Apsandake, Bristibar saloba uni re·baako champengsogen aro uko office-o napna on·jawa ine NGEA-ni padot Pa Senora Johny Arengh aganaha.
Indita jingjengataniko dakgenchimoba a·dokni skotong ministerni knachakjaenganina aro GHADC-o kam ka·giparangna dormaha on·na gisiko nangjaenganina re·baenggipa March 10 tarik chong·motan, Butbar saldipet sima dongija okgimu chakaniko a·bachengatskagen ineba NGEA-ni dilgiparang parakatkuaha.
“Chinga okkrie sioba an·tangtangni man·gninasa on·kange dabienga, uni gimin dabianiko chu·sokatkuja dipet chingni okgimu chakaniko dontongjawa aro iako antigimik konta 24-na kingking chotchanggija koborrangko ra·ate salantian songbadrango mesokatgen. Iako dakengon sanaba maiaba a·sel-obosta ong·genchimoba chu·gimik daitoko skotong minister Pa Conrad Sangma ra·skana nanggen,” ine NGEA-ni dilgiparang mikrakatjolaha.
