Shillong, May 29: Garo Hills Autonomous District Council (GHADC)-o kam ka·enggiparangni man·na nangkuenggipa dormaharangko on·na gita a·dok sorkari, minor minerals aro MV Tax-oniko jabongani man·gnirangko skang on·sochengna ku·rachakaha ine Sonibar salo GHADC-ni chief executive membor (CEM) Benedic R Marak parakataha.
“GHADC-o kam ka·enggiparangni man·na nangkuenggipa ja 34 dormaharangni bidingo da·al anga chief minister baksa agangriktaiaha aro ua minor minerals aro MV Tax-oniko jabongani man·gnirangko GHADC-na on·sochengna ku·rachakataha,” ine GHADC-ni CEM parakataha.
Tangkarangko mikkang antini gisepon council-na on·atnaba gnang ineba Marak parakataha.
Jingjengatanirangko dontonge kamtangtangona re·bapiltaichina aro an·tangtangni dormaharangko ra·chakchina gitaba ua GHADC-o kam ka·enggiparangko didiataha.
Koborko on·ani gitade, batanggimin bilsignini gisepo baditaba chang GHADC-o kam ka·enggiparangna dormaharangko on·ahachim.
GHADC-o kam ka·enggiparangnaba 5th Pay Commission-ni recommendation-o pangchake dormaharangko on·na gita gitcham executive committee (EC) ku·rachakmanahani gimin dormaharangko gital pay scale-osa on·china gita Non-Gazetted Employees Association dabiengachim.
Indake ong·engon, GHADC-o ong·enggipa obostarangko namatna gita a·dokni Chief Minister Conrad K Sangma-ba dakchakna gita ku·rachakaniko on·ataha.
GHADC-o kam ka·enggipa manderangni man·na nangkuenggipa dormaharangko on·na man·na gita a·dok sorkariba dakchakanirangko on·gen ine Sonibar salo a·dokni Chief Minister parakataha.
GHADC-o kam ka·enggiparang bilsi gittam ong·na sipile dormaharangko man·kujaengani gimin kamrangko ka·gija jingjengattokengani a·sel GHADC-o pilak kamrangan batanggimin jagittamonin ja·donggatako man·engahachim ine nikna man·a.
Chief Minister-ni parakatani gitade, autonomous council-rangara an·tangari jakgitele chalaigipa dolrangsa ong·ani gimin tangka paisani kamrangkoba an·tangarisa nirok sandina nangachim indiba GHADC-o neng·nikanirangko chagrongna nangenga ine nikahani giminsa a·dok sorkari, dingtangmancha GHADC-na ia chango dakchakaniko on·enga.
“Council-ko chalaianio nangchongmotanide kam ka·giparang, executive committee aro council-ni gisepo ku·cholsan ong·ani dongna nanga,” ine Sangma parakataha.
