Tura, Jan 7: Garo Hills Autonomous District Council (GHADC)-o neng·nikenggipa obostarangni gimin Bristibar salo Tura Circuit House-o tom·e chanchirima. Ia tom·aniko GHADC-ni Secretary, department ge·antini Officer-rang aro Tura-ni dingtangdingtang NGO dilgiparangko okame GHADC-o ong·enggipa obostarangni gimin agan-talatangaha.
Tom·anio GHADC-ni Secretary, Ma Rikse R.Marak GHADC-o neng·nikbatenggipa tangka paisani gimin NGO dilgiparangna agan talate on·angaha. GHADC-o kam ka·enggiparangna dormaha on·na man·gijani a·selara tangka paisa dongjani giminsa ong·enga ine ua aganaha.GHADC, Minor Mineral Resources-oniko 60% percent revenue-kosan man·enga. Unbaksana Rural Administration-oniko revenue man·soa gimik 1.70-oni 1.80 krol tangkakosan man·engani gimin kam ka·giparangna dormaha on·na chu·ongja maina kam ka·giparangna jasani dormaha on·na gita komigipa 3.69 krol aro batgipa 4.88 krol tangkarangko nangenga ine aganaha.
Uni gimin GHADC-ko namdapatna ku·cholsan ku·monge kamrangko ka·na nangenga aro A·chik jat sakantini dakchakachisa GHADC-ko tang·doatna aro namdapatna man·gen, ia miksonganio na·simang baksa ku·mongrimna tom·aniko ong·ataha ine Ma Marak aganaha. Maina manderang angni kosako ong·gija chanchisrete matnangenba GHADC-o maimancha ong·e kam ka·giparangna dormaha on·na man·jaenga ine sing·dogiparang bang·en gnang, anga Secretary ong·genchimoba GHADC-o ong·enggipa obostarangko namdapatna neng·beani ong·a uni gimin na·simang sakantini openion-ko nanga ine ua aganaha.
“Angni GHADC-o Secretary ong·e kam ka·a bilsi gni ong·aha aro angni smoio kam ka·giparangna ja 13-ni dormahako jedake jotton ka·e on·na man·aha.Uni gisepon anga mikkangchi GHADC-ko namdapatna kamrangko ka·angkugen” ineba ua aganaha.
GHADC-o da·alona kingking Service Rules aro Financial Rules dongkuja, indiba service rule-ko chinga draft ka·e District Council Affairs (DCA)-ona watatjok, jedakode chingni taria ong·ama ong·ja uko check ka·e District Council Affairs Dept(DCA)-ona watatgen, DC uko Law Department-ona watatskagen,indiba iani maming kobor sokbakuja.Iarangan mongsonggipa GHADC-ko namdapatna rabie kam ka·ani ong·enga ineba Ma Marak jinmana agan talatangaha.
