Tura, June 23: A·chik a·songko dingtangatna ine pangchakaniko donenba, ABDK BYF, East and West Wildlife Division, DFO Tura, West Garo Hills baksa nangrime, Garo Hills Environment Protection Society (GHEPS), mija Butbar salo West Garo Hills-ni Norek Daribok-o Environment Sustainability-ni bidingo chong·motan an·chingni samtangtangko simsake jakkalani gimin manderangna ma·siate on·na gita awareness programme-ko ong·atangaha.

Ia awareness programme-ko ong·atgipao, ABDK BYF-ni dingtang dingtang Krima-ni dilgiparang, Nokrek Daribok jolrango songdongenggipa manderangba re·bae bakko ra·angtokaha.

Programme-ona dingtang dingtang sokbagipa manderang, A·chik a·songni samtangtangko mikkangchina chel·chake aro ripinge rakkiani bidingo pilak tom·bagiparangna unomiting aganangengon, Garo Hills Environment Protection Society (GHEPS)-ni advisor aro Samanda St. George Parish Priest Rev. Father Jimberth K Marak, pilak samtangtangni ong·siroroanganio A·chikrangni dakdualanirang gnangma ingipa katta ja·pango pangchake manderangna nambee agan-talate on·angaha.

Samtangtangko ripinge rakkianio A·chik a·songo songdongenggipa sakantini ka·gni kamrang ingipao pangchake Te Roger Benny A Sangma, jinmana talate on·angengon, songdongenggipa manderangni da·on dakna nangenggipa kamrangni gimin GHEPS-ni padot Dr. Merill N Sangma-ba namen ra·biani gnanggipao pangchake manderangna aganangskaaha.

Programmo bakko ra·angpagipa Krima IV-ni Youth Secretary, Waipin K Marak, A·chik a·songni chiring-chibisikrangko tange rakkianio chadamberangni ka·gni kamrangni gimin Isol-ni kattarang baksa toe aganenba sakantina agan-ku·pattianiko on·angaha aro GHADC-ni CEM gitcham Pa P. K. Sangma-ba, samtangtangko rakkianio manderangni simsakna aro dakna-ka·na nangenggiparangni bidingo jinmana agan-talate on·angskaaha.

Bon·kamao, Tura-ni MDC, Pa Bernard N Marak, samtangtangko chel·chakna gita A·chikrangni ia somoirango dakna nangenggipa kamrangko mesoke on·an baksa, da·oni a·bachenge simsak-nirokanirangko dakgijanichi re·baenggipa salrango dingtang dingtang dakgipa neng·nikanirangko chagrongnini gimin manderangna mikrakataniko on·ange, pilak samtangtangna ka·sana aro simsakna nangani gimin manderangna didianikoba on·angjolaha.

Programme matchotani ja·man, ABDK-ni youth director aro GHEPS—ni dakchakgipa padot Pa Durasal Marak, biaptangtango, songtango A·chik a·songni samtangtangna simsakna, uarangna ka·sana aro uarangko ripingna gita ja·kurangko de·chakate sakgipinrangnaba apsandake agan-skie aro mesoke on·skana gita jakrani jakko ka·bako donenba jinma ku·rachakaniko dakdilangaha.

Iakoba poraie nina man·gen: Garo Hills-o ge·sa mangmang dongpagipa B.Ed College-ni seat-ko bariatchina aro Masters course-ko a·bachengate on·china dabianga

WATCH:

Find latest news from every corner of Northeast India at hubnetwork.in, your online source for breaking news, video coverage.

Also, Follow us on-

Twitter-twitter.com/nemediahub

Youtube channel- www.youtube.com/@NortheastMediaHub2020

Instagram- www.instagram.com/nemediahub