Shillong, April 26: Meghalaya a•doko komibeoba bilsiprako 60000 metric tone e•chingrangko ong•katatna man•rongenga. A•doko e•ching ge•aniko namdapatna miksonganio department of agriculture and famer’s welfare gita e•chingni rokomrang jekai ISR Mahima, IISR Varada aro Nadia ingiparangko namdapatna kam ka•chakatgnok.
Ia missionni gita kam ka•chakatanichi bang•a game-ge•e cha•giparangna dakchakbeaniko on•gnok. A•doko e•ching man•ani 10000 ha oni 12,500 ha ona man•skagnok. E•ching palbadinganiko namdapatna game ge•e cha•giparangna skie on•anikoba on•angjolgen. “Ia missionko a•bachenge on•ani miksonganiara a•dok gimiko game-ge•e man•dapaniko namdapatna miksongani ong•a. An•ching a•doko 70% ni gita manderang ge•e- game cha•giparang ong•a. Uamangko ra•dona aro namdapatana ian sorkarini ja•ku de•ani ong•enga” ine skotong minister iako a•bachengatani salo aganaha. “Sying Makhir” jean nambegipa sam ong•a, uandakgipa gamchatgipa samrangko rakkiani bidingoba ia missioni gitan namdapataniko on•gen aro an•chingo man•gipa e•ching aro gipin samrangko ripinganio ian dakchakbeani ong•gnok ineba ua aganaha.
Uni aganani gitade ia missiona tangka gong kror 121ko bilsi 3 na donsoaha aro mikkangchi Meghalaya a•dok a•gilsak gimiko gittamgipa e•ching man•batsranggipa a•dok ong•atna man•chongmotgen. Iako oprake on•angani salo skotong minister dingtang dingtang e•chingni rokomrangko game ge•e cha•giparangna sualjolangaha.
