Shillong, March 5: Gipin biaprangoni re•bae kamrangko ka•e cha•enggipa manderangna, Migrant Workers Act 2020-ni Meghalaya Identification Registration (Safety & Security)-ni ning•o online registration portal ba internet gita biming segatani kolko da•al Sukrobar salni bako, Meghalaya a•dokni Deputy Chief Minister Prestone Tynsong, Shillong songjinmani NIC Conference Hall-o a•bachengate on•angaha.
Ia Meghalaya Identification Registration (Safety & Security) of Migrant Workers Act 2020-ni miksonganiara gipin biaprangoni re•bae a•doko kam ka•e cha•enggipa manderangko biming segate naljokaniko on•anian ong•engachim. Gipin biaprangoni re•bae kamko ka•e cha•enggiparang aro uandakgipa manderangna kamko on•enggipa contractor-rang ia online registration portal-ko jakkale bimingrangko segatna man•gen indiba ia kolko ra•gatani ja•mano bimingrangko segatgija kamrangko ka•enggipa manderangde gong 5000/-ona kingking daiko gamna nanggen. Online registration ba biming segataniko a•songni je biaponiba dakna man•gen aro gong 50/-ko game common service centre ba registration office-ni help desk-oba dakna man•gen.
Ia online registration portal-ko a•bachengate on•angani somoio a•dokni Deputy Chief Minister jinmana aganprakangengon, Meghalaya Identification Registration (Safety & Security) of Migrant Workers Act 2020-ko a•doko pass ka•ahani gimin da•o labour licence-rangko on•anide a•dok sorkarini jakosa ong•aha ine parakataha.
Ia online portal-ko a•bachengatanichi kamrangko altubatatgnok ine janapatengon, a•dokona re•bae kam ka•e cha•enggipa manderangko name segate rakkina man•na gita ia portal ba kolko jakkalchina Tynsong, dingtang dingtang dolrangko didiangaha.
Dingtang dingtang department-ni kamrangko matchotatna gitade gipin biaprangoni manderangkoba rimbae kam ka•atna gita nangaia ine talatangengon, ia Act-ni nangchongmotgipa niamrangko chu•sokatgipa manderangnasan sorkari labour licence-rangko on•na man•aigen ine Deputy Chief Minister parakataha.
