Tura, March 9: Re·baenggipa April 12 tariko ong·atnasienggipa Garo Hills Autonomous Distrct Council (GHADC) eleksino gipin jatrangna susana cholko on·e dingtang dingtang political dolrangni tikitrangko on·anina aro a·dokni dakchakgipa skotong minister Pa Prestone Tynsong aro skotong minister gitcham Dr. Mukul Sangma-mangni adita salrangna skang gipin jatrang GHADC eleksino susana aro vote pu·onna man·a ine ku·watgipa kattarangko All Garo Hills Joint Action Committee (AGHJAC) jegalataha.

Indake nikatna man·gen je, da·ororo A·chik a·songo so·so-jengjeng golmal ong·batenggipa mamlara GHADC-o kam ka·giparangna dormaha on·chipgijani aro eleksino susachina gita gipin jatrangna party tikit on·ani giminan ong·engachim.

Iani bidingo A·chik a·songni dingtang dingtang NGO-rang gipin jatrangna party tikit on·aniko jegale jingjengataniko a·bachengatan baksa re·baenggipa April jao ong·nasienggipa GHADC eleksinko champengatna gitaba miksongenga.

Indake ong·engon, gipin jatrangna susana gita cholko on·e dingtang dingtang dolrangni tikit chamaniko jegale uamangni namnikgijaniko mesokna gita AGHJAC, re·baenggipa March 11 tarik, chong·motan Bristibar salo West Garo Hills a·jani Deputy Commissioner office mikkango asonge jingjengataniko ong·atanggen ine AGHJAC-ni Chief Organizing Secretary, Jason Tengkrang M. Sangma koborna parakataha.