Shillong, June 8: Meghalaya a•dokni gital Assembly building-ko rikna songako man•gipa High Powered Committee, Bristibar salo, Shillong songjinmani Taj Vivanta-o tom•aniko ong•atangaha.

Ia tom•anio Meghalaya Assembly-ni Speaker Thomas A Sangma, Chief Minister Conrad K Sangma, Deputy Chief Minister Prestone Tynsong, sakgipin Deputy Chief Minister Sniawbhalang Dhar, gipin MLA-rang aro dingtang dingtang department-ni officer-rangba bak ra•angaha.

Ia tom•aniko ong•atani bidingo Assembly-ni Speaker Thomas A Sangma, kobor ra•timgiparangna talate on•angengon, ia tom•anio Assembly-ni mongsonggipa building-ko rikani report-ko ra•angan baksana gnigipa bakko rikanina proposal-ko tariani bidingo aro security system-rangni giminba niangaha ine parakataha.

Gnigipa bakna proposal-ko High Powered Committee, Assembly Secretariat aro line department-rangba ra•chakahani gimin da•o proposal-ko DoNER Ministry-na on•atgnok ineba Sangma parakataha.