Tura, May 28: Garo Hills Autonomous District Council (GHADC)-o kam ka·enggiparangna gital executive committee (EC), bilsisani dormaharangko gital pay scale-o on·genchimode jingjengataniko dontonggen aro kamtangtangko ka·piltaigen ine Sukrobar salo Non Gazetted Employees Association (NGEA)-ni dilgiparang parakataha.
GHADC-o ong·enggipa obostarangko namatchina gitaba NGEA-ni dilgiparang, Meghalaya a·dokni Chief Minister Conrad K Sangma-ko mol·molataha.
“Meghalaya a·dokko NPP sorkarian chalaienga aro GHADC-oba NPP dolan EC-ko dilengani gimin GHADC-o kam ka·enggiparangna dormaharangko on·e neng·nikanirangko namatani daitoba NPP dolnian ong·a. Uni gimin chinga chingni neng·nikanirangko ma·sichake chingni dabianirangko niatchina Chief Minister-ko mol·molenga,” ine NGEA-ni secretary Brithen M Sangma, Hub News baksa agangrikengmiting somoio parakataha.
Executive committee-ni on·enggipa jabongani dormahako gitcham pay scale-ode maming dakeba ra·chakjawa ine gisik ra·ataniko on·angtaiengon, GHADC-o kam ka·enggipa manderangni neng·nikanirangko namatna gita GHADC-ni CEM Benedic R Marak ku·rachakahachim indiba uamang baksa changni chang golpoani ja·manoba ua uamangni dabianirangko chu·sokatna man·jaha ineba NGEA parakataha.
“Chinga a·bachengonin gital pay scale-osa dormaharangko on·china dabiaha aro da·oba chinga gital pay scale-kosa dabienga. Kam ka·giparangna gitcham executive committee-an gital pay scale-ko ra·chakangaha ong·ode maini gimin da·o gital EC, chingna gital pay scale-ko on·na jechakskaenga?” ine NGEA-ni secretary sing·doangaha.
