Shillong, Feb 21: Sombar salo, Meghalaya a•dokni gitcham home minister aro ia election-o United Democratic Party (UDP)-ni candidate ong•e susaenggipa HDR Lyngdoh siangahani gimin Sohiong constituency-ni MLA election-ko ra•doataha.
Meghalaya Assembly election-ko re•baenggipa February 27 tariko ong•atna manchimanahachim indiba Sohiong constituency-o UDP-ni candidate aro gitcham home minister siangahani gimin ia constituency-ni election-ko ra•doatskaaha.
A•dokni Chief Electoral Officer (CEO) Frederick Roy Kharkongor-ni u•iatani gitade, badiaba constituency-rango iandakgipa a•sel ong•on, ua constituency-ni returning officer (RO), ua constituency-o election-ko dontongatchengchina ku•pattianiko on•ronga aro ia changoba RO-ni report aro recommendation-ko CEO, Election Commission of India (ECI)-ona watdoatahani gimin ia constituency-ni election-ko ong•atna ECI gital tarikko tik ka•e u•iatskagnok.
Meghalaya a•dokni gipin dam 59 constituency-rangode a•bachengo tik ka•gimin gitan February-ni 27 tariko ong•atanggen ineba CEO parakataha.
A•dokni gitcham home minister aro UDP-ni candidate HDR Lyngdoh, Sombar salo tanggitik ka•tong saaniko man•enba a•gilsakko watangahachim.
