Imphal, Mar 21: Gnigipa changna Manipur a•dokni Chief Minister ong•e seokako man•ani ja•man Sombar salo, Nongthombam Biren Singh, kamtangko ka•angna gita ku•mikchetangaha.
Singh-ni ku•mikchetaniko Manipur a•dokni Governor La Ganesan, Imphal songjinmani Raj Bhawan-o dakdilangaha.
Ia apsan salon, Chief Minister Biren Singh baksana seokako man•gipa BJP aro Naga People’s Front (NPF)-ni sakbonga MLA-rangba Governor-ni mikkango ku•mikchetangaha.
Ia sakbonga MLA-rangoni sakbride BJP dolni, Thongam Biswajit Singh, Yumnam Khemchand Singh, Govindas Konthoujam aro Nemcha Kipgen ong•a aro saksade NPF-ni Awangbow Newmai ong•a.
Biren Singh-ni sorkario da•o dipet gitcham minister Nemcha Kipgen saksakamkamsan me•chik minister ong•engpiti indiba cabinet-o sakdok minister-rangna biaprang dongkuengani gimin ja•mano gipinrangkoba rimdapkunaba gnang.
Chief Minister aro MLA sakbongani ku•mikchetanio BJP-ni president JP Nadda, Assam-ni Chief Minister Himanta Biswa Sarma, Tripura-ni Chief Minister Biplab Kumar Deb aro gipin dilgiparangba dongpae bak ra•angaha.
