Tura, Nov 13: Bon·atako man·gipa Garo National Liberation Army (GNLA) bobil dolni dape donnugipa ine chanchichipenggipa adita bang·a silchidareni gulli-barutrangko South West Garo Hills district-ni Damalgre Police Station-ni ning·ogipa Naragre songni buring diltuaoniko West Garo Hills (WGH) police mija Bristibar salo man·aha ine koborko man·soaha .
Police-ni iarangko sandiate man·taianiara, bobil dol GNLA-ni dape donanggipa namen bilakgipa slai gullirangko South Garo Hills-oniko Meghalaya police-ni man·damani salgnirang ja·mano ong·aha.
Koborrangko man·ani gitade, ge·gittam timarang (box)oniko gimik rong 254 silchidareni gullirangko WGH police sandiate man·aha.
“Ma·sigipaoniko koborrangko man·soanio pangchake, police dolni sandiataniko Deputy Superintendent of Police (Headquarter)chi dakdilaha ine West Garo Hills-ni Superintendent of Police, Dr MGR Kumar aganaha.
Sandiate man·gipa gullirangko dape dongipa biapara West Garo Hills aro South West Garo Hills a·jarangni gisepgriko ga·aka. Iarangna agreba, man·gimin gulli-barutrangko, FIR baksana iani bidingo nanga gita kamrangko ka·angchina SWGH-ni SP-na u·iatanga baksa Damalgre Police Station-ni Officer In-charge-na pakwatataha.
“Bobil dolni dape dongipa silchidare aro gulli-barutrangko da·o gita am·sandiate man·dapangkuna chinga ma·sigipaoniko koborrangko sandiroroenga aro iani gimin ma·sigipa saobarang dongode chingna srik-srik u·iatchina gita pilakkon mol·mola. Uarangko sandiate man·aniara, a·dokni niam aro ge·etanirangko name rakkina, tom·tomaniko ra·bana aro ong·gijagipa manderangni jako ga·akaoniko champengsoachi a·dokni manderangna bang·a namgni ong·gen ine Dr Kumar didianiko on·aha.
