Shillong, March 5: Meghalaya Legislative Assembly-ni Budget Session-ko da•al Sukrobar salo, a•dokni Governor Satya Pal Malik-ni aganprakanichi a•bachengataha.
Meghalaya sorkarini a•bachengatgipa dingtang dingtang kamrangni gimin aganprakangengon, an•seng baljokani aro lekka porani kamrangko nambatatna gita sorkari gisikko on•bate kamko ka•enga ine a•dokni Governor parakataha.
“Iarangna agreba Agriculture, Fisheries aro Animal Husbandry department-ni kamrangko dingtang dingtang dolrang baksa nangrime jako ra•anichi a•dok sorkari, songadam nokadamrango janggi tangani gadangko tang•doatna kamko ka•enga,” ine Malik aganaha.
Health & Family Welfare department-ni ning•o ra•gatgipa kamrangni gimin janapangskaengon, dingtang dingtang neng•nikani aro ra•bianirangko chagrongna nangengoba a•dok sorkari, manderangna tikarangko on•na tariaha ine Governor parakataha.
COVID-19-ni giproroaniko champengna gita kam ka•anio a•dok sorkari chu•sokgipa ong•na man•aha aro joltango man•enggipa neng•nikanirangko joltango man•enggipa cholrangchin namatna gita dingtang dingtang dolrang baksa bakrime manderangna mikrakatanirangko on•na kamko ka•enga ineba Governor aganaha.
A•doko niam retirangko rakkiani bidingo janapangskaengon, Meghalaya a•doko Inner Line Permit (ILP)-ko ra•gatchina dabie aro Citizenship Amendment Act-ko jegale dingtang dingtang dolrang jingjengatanirangko dakahachim indiba a•dok sorkari, maming a•sel nanga gri iandakgipa a•selrangko chel•chakna man•aha ine Governor parakataha.
Meghalaya a•doko lekka porani kamrangko namdapatna gita sorkarini ja•ku de•anirangko janapangskaengon, sorkari skulrango primary gadangoni higher secondary gadangona skul nokrangko Education department, taridapna a•bachengaha ine Governor parakataha.
Tourism-ni gimin aganangengon, a•doko Tourism-ko tang•doatna gita sorkari nangnikenga aro India sorkariba Swadesh Darshan scheme-ni ning•o gong kro 85-ko aro PRASAD scheme-ni ning•o gong kror 39-ko a•dok sorkarina chame on•ataha ine Governor parakataha.
Indian Constitution-ni Part IV aro IX (A)-ni ning•o man•chapgijagipa biaprangna India sorkarini chamatgipa gong kror 111.5 tangkarangko 2019-2020 bilsini gisepo a•dokni damgittam Autonomous District Council (ADC)-rango namroro silroroani kamrangna chamataha ineba Meghalaya Legislative Assembly-ni Budget Session-ko a•bachengatanio a•dokni Governor parakataha.
