Tura, Jan 27: Greater Tura Urban Water Supply Scheme-na Sombar salo, Meghalaya a•dokni Chief Minister Conrad K Sangma pangchakaniko, Tura-ni District Auditorium-o songe on•angaha.
Meghalaya a•dokni nokdang ge•antinan ringani chirangko on•na gita sorkari rakbee kamrangko ka•engani gimin ia scheme-na pangchakaniko songaniara namen dingtangmanchabegipa ong•enga.
Pangchakaniko songna gita jinma tom•bimonganiko ong•atanio, a•dokni Chief Minister, jinmana aganprakangengon, ia project-na pangchakaniko songahani gimin Public Health Engineering (PHE) Minister, department-ni Principal Secretary aro dingtang dingtang official-rangko mittelpilangenba, ia Tura-o songdongenggipa manderangna gisik ra•beani sal ong•a ine aganaha.
Ia project-na 2004 bilsion chanchiani ong•katchengaha ine gisik ra•atpilengon, Tura jillao china neng•nikanirangko man•rongani gimin PA Sangma sagi, ia project-ko a•bachengatna nangtelenga ine nikenba krenge kamko ka•na a•bachengaha ine Chief Minister aganaha.
Ia project-ko 2018 bilsion a•bachengatani ong•achim indiba dingtang dingtang neng•nikanirangko chagrongna nangahani a•sel a•bachengatna man•chipjaha ine janapatskaengon, ma•mong sorkarini Capital Investment ning•o tangka paisarangko dakchakachi ia gong crore 400-mang ong•gipa project-na da•alo pangchakaniko songe on•na man•aha aro ia project-ko ja 24-oni ja 36-ni gisepon matchotna sienga ine Chief Minister parakataha.
Ia project-na dam-ko rikahaode mitam biaprangko chirang mripnaba dongaha ine ia kamo bakrimaniko aro pilak nanga dakchakanirangko on•china gita ua nangchakegipa songni Nokmarangkoba didiataha.
Manderangni bakrimani gride iandakgipa scheme-rangko ra•gatanichi chu•sokgipa ong•na man•jawa ine janapatengon, mikka chi brachakgipa biaprangko ripinge rakkichina aro iandakgipa biaprangko tange rakkianio, nangchakegipa department-ni official-rang baksa bakrimchina ua, dingtang dingtang songni aro gittimni manderangkoba didiangaha.
Re•anggipa bilsi dipet a•doko load shedding ka•ani ba somoi gita bijoli kimitaniko dontongatahani gimin ia bilsioba apsan daken load shedding-ko ka•jawa ineba ia tom•anio Chief Minister parakataha.
Chief Minister-ni aganani gitade, a•doko bijoli aro chirangko chu•onga gita manderangna on•na sorkari jotton ka•engani gimin ia bilsioba sorkari, load shedding-ko ka•taijana miksongenga.
Gital Administrative Complex-na pangchakaniko songmanaha aro Tura-oba ia project-na bakan kamrangko a•bachenggnok ineba Chief Minister aganaha.
Tura-o tarienggipa IT Park-rangni gimin janapangengon, ia kamrangko matchotahaode jolni chadamberangna janggi tangani cholrangko on•na man•gnok ine Sangma parakataha.
Tura jillako nitobatatani scheme-ni ning•o gnigipa bakko ia bilsini gisepon a•bachenggnok ine janapatskaengon, Tura jillako rongtal an•tale rakkichina gita Chief Minister, Tura jillao songdongenggipa manderangko didiangaha.
Ia tom•anio, a•dokni PHE Minister Marcuise N Marak-ba jinmana aganprakengon, Chief Minister-ni dilanichi a•bachengatenggipa ia Greater Tura Urban Water Supply Scheme-ara, a•doko nokdang ge•antinan chirangko chu•onga gita on•na sorkarini rakbee kam ka•anio chu•sokaniko mesokani ong•enga ine parakataha.
Songadam nokadamrango donggipa ge 4550 nokdangrangnasan chi pipe-rangko sokate on•ani ong•achim indiba da•alo lak 5 nokdangrangna Jal Jeevan Mission (JJM) scheme-ni ning•o chi pipe-rangko sale on•na man•aha ineba Marak aganaha.
Ia tom•anio, PRIME Tourism-ni garirangkoba seoka man•gimin manderangna Chief Minister-ni jakchi pakwate on•angjolaha.
Na·simang ia video-koba nina man·gen:
Na·simang iakoba poraina man·gen: Samtangtangko nisigija Alotgre Stadium-ko taridapna CM ku•pattia
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
