Guwahati, Aug 24: Mingsa obosta ong·anio, Assam a·dokni Lakhimpur district-ni saksa BJP dolni a·gipi dilgipa, sajinmani somoimitingo dingtang dingtang kamrangko ka·e on·anio a·dok sorkarini tangka-paisarangko gamjani a·sel grorangko chotpilna man·je neng·nikaniko chagrongeming mija Sombar salo an·tangko kae siaha ine koborko man·soaha.
Knasoani gitade, BJP dolna kam ka·gipara Mithuranjan Das minggipa ong·achim jean Sombar salo Assam, Lakhimpur district-ni Laluk-o donggipa noktango an·tangko kae siaha.
Ia obostani bidingo police-ni talatani gitade, sianggipa Das, chitti kingsako see donangaha jeon ua an·tangni tangka-paisao neng·nikaniko man·anio Assam sokariko dosi on·angaha.
Matnangani gitade, rama tariatanina gong lak 20 tangkarangko man·gni dongachim ine police agan-talataha.
Grorang bang·e donggipa BJP dilgipani sina skang chitti see donanggipao, rama tariatanina sorkarini atako gamatgipa tangka gong lak 10-koba bank-oniko bikotna man·jaha ineba ua matnangaha.
Ja·pangoniko koborko man·soani gitade, Mithuranjan Das, COVID Care Centre-oba pilak nangchongmotgipa bosturangko sokatbae on·achim, jeni tangkarangkoba ua man·chipangjaha.
COVID Care Centre-na nangchongmotgipa bosturangko sokatbae on·anio Assam sorkariniko tangka gong lak 17-rangko ua man·gni dongachim ineba ja·pangoni u·iatkuaha.
“Manggisiko rate porikka ka·na gita chinga watataha aro iani report-ko man·ani ja·man uni siani chong·motko chinga u·ina man·gen. A·bachenge sandirokatanio ma·sina man·ani gita ian an·tangko so·ote simanchaasa ong·na nanga,” ineba police official agandapataha.
