Tura, April 25: A·chik a·songna dingtang a·dokko on·china gita dabidilenggipa Garoland State Movement Committee (GSMC), a·doko songdongenggipa jatgittamni gisepo da·ororo Roster System aro Job Reservation Policy-ni bidingo aro Tura-ko Winter Capital songani gimin jera-ra·grikanirang ong·engon, Meghalaya a·dokko bak dake on·china gita GSMC-ni dabianio apsan bakrimanirangko on·china gita Khasi jong-adarangko mol·molangskaaha.
Iani bidingo koborna seachi janapatengon, A·chik matgrik Pa Sonaram R Sangma, A·chik jatna politicalni gita kakket ramako mesoke donangjaode political-ni gitaba A·chik jatrang namen ja·manchakgenchim, aro Meghalaya-ni skotong minister ong·chenggipa Pa Capt. Williamson A Sangma-ba, a·doko songdonggipa mongsonggipa jatgittam jekai Garo, Khasi aro Jaintia-rangna Job Reservation-o apsangrikko on·na gita niksamsoani gnang kamko ka·angaha, indiba iarang chu·sokgipa ong·jaha ine janapatan baksa, Roster system aro Winter Capital-ko ru·uta bilsirangonin A·chik jatna dabibaenga indiba a·dokko man·aoni bilsi 50-ko ga·dapoba chu·sokna man·kujani gimin, jatgittamni dingtang dingtang man·gnirangko mikkangchi chu·gimik man·na amna gita Meghalaya-oniko bak dake dingtang a·dokko on·china dabianio apsan bakrimaniko on·china gita Khasi aro Jaintia jong-adarangko, GSMC, mol·molangaha.
Iandakgipa mamlarangni bidingo a·doko songpanggipa monsonggipa jatgittamni gisepo bang·a changon melina gita man·rongjaengani gimin GNC aro GSMC, skangonin dingtang a·dokna dabibaenga aro uandake, Khasi aro Jaintia-rangna dingtang a·dokko on·skachina gita HITO aro HSPDP -rangba dabienga ine GSMC, janapatjolaha.
Iakoba poraie nina man·gen: W’nagar MLA-na Loyola College-ni gita mande ra·pilskaaniko daka
