Shillong, July 4: Adita salrangna skang, Haryana a·dokni Gurugram-o Nagaland a·dokni chadambe sakgni, ong·na kragija dake siangahani gimin Meghalaya a·dokni Governor Satya Pal Malik-ba Union Home Minister Amit Shah-na sedoataha.
Gurugram hospital-o Rosy Sangma minggipa me·chikni siangani ja·man, uni sianina hospital-o kam ka·enggipa doctor aro nurse-rangko uni grigipa Samuel Sangma matnangahachim indiba salgipino uni manggisikoba dingdee dongakosa man·ahachim.
Ia a·sel ong·ani ja·mano dingtang dingtang dolrang, hospital-o kam ka·giparangko matnange, ia a·selni bidingo am·sandiatchina aro dos donggipa manderangni kosako rakgipa ja·kurangko de·china dabitokengachim ine nikna man·a.
Indake ong·engon, ia a·selni bidingo a·dokni Governor-ba Union Home Minister-na sedoate, inquiry-ko dakatchina didiataha ine Raj Bhavan-ni official-rang kobor on·ataha.
Meghalaya a·dokni Governor Satya Pal Malik an·tangan da·o New Delhi-ona re·angengani gimin, sianggipa mande sakgnina kakket bichalko on·na man·na gita inquiry-ko dakchina ma·mong sorkari baksa agangrikanggen ineba Raj Bhavan-ni official-rang parakataha.
