Guwahati, Feb 6: Sombar salo, Guwahati songjinmani hotel damsao mande saksako so•ote katna jotton ka•engmiting somoio police-rang me•a aro me•chik sakgniko rim•na man•aha.
So•ota man•gipa mandeara bilsi 42 ong•gipa Sandip Suresh Kambli ong•achim aro uko Guwahati songjinmani Radisson Blu Hotel-o so•otaha. Uko so•otani ja•man, bilsi 25 ong•gipa Anjali Shaw aro bilsi 27 ong•gipa Bikash Shaw, Kolkata-ona sildorengo bile katangna jotton ka•engachim indiba uamang airport-ona sokangna skangan police-rangni ta•rake kamko ka•anichi rim•ako man•aha.
Guwahati-ni Police Commissioner Diganta Borah-ni parakatani gitade, sianggipa Kambli-ara Pune songjinmao hira badinggipa ong•achim aro uko hotel-o kam ka•enggipa mande saksasa, gingtingoni an•chi ong•rurue a•ao ga•ake dongako nikchengahachim.
Rim•ako man•gipa Anjali Shaw-ara Kolkata airport-ni restaurant-o kam ka•gipa ong•skaachim aro ua re•anggipa bilsionin Kambli baksa mikchakgrikna a•bachengahachim.
Indake ong•genchimoba una skangan Anjali, Bikash baksa mikchagriksoahani gimin aro uko bia ka•na dekdo ka•e dongchaengahani gimin Kambli baksa mikchagrikanio adita neng•nikanirangko man•na a•bachengaha.
Police-rangni sing•sandianio Anjali-ni ku•rachakani gitade, Kambli-ni mobile phone-o uamang sakgnini apsan ka•gipa photo-rang dongani gimin Anjali aro Bikash sakgnian, Kambli-ko grongenba ia photo-rangko kimite galchina aganna tik ka•ahachim.
Tik ka•grikgimin gitan uamang sakgittam Guwahati songjinmani Radisson Blu Hotel-ona re•baaha aro hotel-ona Anjali, Kambli baksa re•baaha indiba Bikash-de an•tang saksansa hotel-ona re•baaha ine Police officer aganaha.
Sombar salni 2:30 bajimango, Bikash aro Kambli-ni gisepo jegrikna a•bachengaha aro Anjali baksa tik ka•gimin gita Kambli-ni mobile phone-o donggipa photo-rangko kimite galna jotton ka•on, uamang dolgnini gisepo dinggrikanirangba ong•kataha aro Kambli mata bu•anirangko man•e, a•aona ga•akenba siaha ine Borah parakataha.
Ia a•sel ong•ani, Radisson Blu Hotel-ni room nombor 907-o ong•aha aro sianggipa mandeni manggisiko da•o dipet Guwahati police-ni ning•o dongengkua ineba Borah aganaha.
Iakoba poraie nina man·gen: LP skulni skigiparangna CM-ni jakchi appointment letter-rangko sualata
Watch
Find latest news from every corner of Northeast India at hubnetwork.in, your online source for breaking news, video coverage.
Also, Follow us on-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/nemediahub
