Guwahati, Aug 19: Sukrobar salo, Kuki Tribal Union (KTU) bobil dolni sakchet manderang, Haflong-ni Sarkari Bagan-o donggipa 11 Assam Rifles camp-o army-ni commanding officer-na an·tangtangko bame on·eaha.

Koborko on·ani gitade, an·tangtangko bame on·egipa bobil dolni manderangara, Kuki Revolutionary Army (KRA) bobil doloni ma·ekbae KTU dolo napeskagipa manderang ong·achim aro batanggimin somoirango uamangni tangka dabie ra·ako rim·a man·ani ja·man Assam Rifles-ni official-rang uamangko bame on·echina didiengachim. Uandaken ia sakchet manderang, Sukrobar salo Assam Rifles camp-ona re·bae commanding officer-ni mikkango an·tangtangko bame on·eaha ine kobor on·aha.

Ia KTU bobil dolara, NSCN(IM) bobil dol baksa bak ong·enggipa dol ong·achim aro ia dolni manderangna Nagaland a·dokni Hebron camp skie on·anirangko dakrongengachim. KTU bobil dolko NSCN (IM)-ni bak ong·ate 1960 bilsini a·bachengachipakan bikotahachim ine kobor on·timgiparang u·iataha.