Shillong, Nov 10: Assam-oniko Meghalaya a·dokko bak dakanio jak on·e kamko ka·dilchenggipa aro Hills State Movement-na dakgrikdilchenggiparangko, Hills State People’s Democratic Party (HSPDP) dol Shillong-ni Anton Hall-o Butbar salo dingtangmancha mande ra·pilskaaniko dakangaha.
Meghalaya-ara skang 1970 jolo Assam-ni ning·o jakgitelgipa a·jako man·chengaha, indake 1972 bilsio India a·songni ning·ao damgipin a·doktangko chu·gimik man·aha.
A·bri jolo donggipa Khasi-Jaintia aro Garo ia jatgittamna dingtang a·dokko man·na gita ja·kuko de·chakataniara skang 1954 bilsini June 16 aro 17 tarikrango Garo Hills District Council-ni dilgipa Captain Williamson Sangma sagi aro Hills State People’s Democratic Party-ni dilgipa aro a·dokni Home minister aro MLA gitcham Pa Hoping Stone Lyngdoh sagi maangni gisepo Shillong songjinmao tom·e chanchirimangani somoio ong·achim. Indake ong·oba, Assam Official Language Bill-ko ra·gatanichi ian mongsongbate Assam-o songdongkamgipa jatni dakbewal aro daka-rikanirangko ripingani giminsa ong·batani gimino Khasi Hills aro Garo Hills a·jao songdonggipa a·bri jatni manderang dingtang a·dokna kingkot dabisrangna draatako man·skaaha.
Assam Official Language Bill, 1960-ko parakatgimin gita, Assam a·dokni ning·ao jeba official kamrangna aro gimiknan Assamese aro English ku·sikko jakkalgen ine niamko ra·gatangahachim.
Uamangko dingtangmancha mande ra·pilskaaniko dakanganio, MLA gitcham aro HSPDP-ni skotong dilgipa Pa KP Pangniang, MDA sorkarini minister gitcham aro MLA Pa Samlin Malngiang, Minister Pa Renikton L Tongkhar aro gipin niksenggipa dilgiparangba dongpatokaha.
