Guwahati, May 10: Bharatiya Janata Party (BJP)-ni dilgipa Himanta Biswa Sarma, Sombar salo Assam a·dokni 15-gipa chief minister ong·e ku·mikchetangaha. Assam-ni gitcham chief minister Sarbananda Sonowal-ni biapko ia chang Sarma ra·angskaaha.
Assam-ni gital chief minister Himanta Biswa Sarma, salgro salaram a·dokrango BJP dolni kamrangko ka·dilgipa ong·achim aro uni gital chief minister ong·e ku·mikchetanio Assam-ni Governor Jagdish Mukhi, BJP-ni national president JP Nadda aro gipin dilgiparangba dongpae bak ra·angaha.
Sarma-ni chief minister ong·e ku·mikchetangani ja·mano a·songni Prime Minister Narendra Modi-ba social media gita una namgipa skaniko on·ataha.
Robibar salo, BJP-ni national president JP Nadda-ni dilanichi Delhi-o tom·aniko ong·atangenba Himanta Biswa Sarma-ko Assam-ni gital chief minister-na mingskaahachim aro uandaken ja·mano Assam-ni gitcham chief minister Sarbananda Sonowal-ba una biaptangko wate on·angahachim.
Assam-ni gital chief minister-na mingako man·ani ja·mano Sarma-ba social media gita Assam a·dokni manderangko mittelpilate, kakketo dangdike on·angna gita ku·rachakaniko on·angaha.
Assam-ni gital chief minister ong·na cholko man·ahani gimin ua a·songni Prime Minister Narendra Modi-koba social media gita mittelpilataha.
