Shillong, Oct 30: Adita salrangna skang, Khasi aro Jaintia Hills a·jarango songdongenggipa manderangko NPP dolna pu·onjachina gita HNLC bobil dolni ka·mikkenatanirangko man·genchimoba Sukrobar salo, Mawryngkneng aro Mawphlang Assembly constituency-ni bye-election-ko ong·atanio bang·bata manderangan pu·onanio bakko ra·angtokaha.
Meghalaya a·dokni Chief Electoral Officer (CEO) FR Kharkongor-ni parakatani gitade, ia damgni constituency-rangon bye-election-ko ong·atani tom·tome matchotna gita man·aha aro ia bye-election-ko ong·atanio bang·bata manderangan re·bae pu·onanio bakko ra·angtokaha.
Attam 5:00 bajiona kingking Mawryngkneng constituency-o pu·onani 74.69 percent aro Mawphang constituency-oba pu·onani 75.97 percent gapdoaha.
“Da·al salni bako ong·atanggipa bye-election-o ja·delgimin aro chadamberangoniba bang·batan gisiko nange bakko ra·angtokaha aro skanggipa changna dilgipako seokanio bak ra·gipa manderangnaba chinga certificate-rangko on·aha,” ine Kharkongor parakataha.
Ia damgni constituency-o ge 6 VVPAT machine-rang nosto ong·ani gimin ia machine-rangni pal gipin machine-rangko jakkalskana nangaha ineba Kharkongor u·iataha.
Mawryngkneng constituency-o gimik sakbonga candidate-rang ia bye-election-o susaenga aro uamangara NPP-ni candidate aro KHADC-ni chairman Pyniaid Sing Syiem, Congress-ni candidate Highlander Kharmalki, Independent candidate Esron Marwein, Independent candidate Arbiangkam Kharsohmat aro sakgipin Independent candidate Norbert Marboh ong·anga.
Mawphlang constituency-oba sakgittam candidate-rang chong·motan UDP-ni Eugeneson Lyngdoh, Congress-ni Kennedt C Khyriem aro NPP-ni Lamphrang Blah susaskaenga.
Ia bye-election-ni result-rangko re·baenggipa November-ni 2 tarik Mongolbar salo parakskana siengachim.
