Shillong, Aug 13: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew, Sukrobar pringo police-rang baksa gogrike so·otako man·aha.
Police-rangni u·iatani gitade, Sukrobar pringo police-rang, Mawlai Kynton Massar-o donggipa HNLC bobil dolni gitcham dilgipani nokko chadrapeani somoio ia a·sel ong·aha.
Adita salrangna skang, Shillong songjinmani Laitumkhrah-o aro una skang Khliehriat Police Reserve-o IED bomarangko gopretani bidingo police-rang, Thangkhiew-ni nokko chadrapeahachim.
Sukrobar salo so·otako man·gipa HNLC-ni gitcham general secretary, 2018 bilsio an·tangko sorkarina aro police-rangna bame on·ahachim. Ua somoio ua a·dokni Deputy Chief Minister Prestone Tynsong, a·dokni gitcham DGP RP Agarwal aro gipin dilgiparangni mikkango Police headquarters-o bame on·ahachim.
Sianggipa Cheristerfield Thangkhiew-ba, 1987 bilsio Hynniewtrep Achik Liberation Council (HALC) bobil dolko bikotdilchenggipa membor-rangoni saksa ong·achim aro uandaken 1997 bilsio HALC dolko HNLC ine mingskaani ja·man ua general secretary-ni kamko jako ra·skaahachim.
HALC dolan Meghalaya a·doko bobil dake chakatchenggipa dolba ong·achim.
