Shillong, Oct 10: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ni siani a·selk CBI-chi sandirokatchina gita Ka Sur Ka Bri u Hynniewtrep (KSKBH), a·dok sorkario dabiangaha.

Iani bidingo KSKBH-ni membor-rang, Sombar salo Khasi aro Jaintia Hills a·jani MLA-rangna chittiko sedoatenba, Cheristerfield sagini bidingo ja·kuko de·china didiataha.

KSKBH-ni dilgipa Thomas Passah-ni kobor ra·timgiparangna parakatani gitade, HNLC-ni gitcham dilgipa Cheristerfield Thangkhiew-ko rim·na gita uni nokko chadrapeani somoio police-rang nangana bate bil jakkalahani a·selsa ua sina nangaha ine inquiry commission-ni report-oba parakahachim.

Police-rang Thangkhiew-ko rim·na re·angani somoio name ja·kuko de·genchimode ua sina gita nangjawachim ine inquiry commission-ni report-o parakaniko toe janapatengon, commission-ni report-o police-rangko dosi chanahani gimin police-rangni kosako sandirokaniko dakenba, dos donggipa police officer-rangni kosako nanga gita sastirangko on·na nanga ine KSKBH dabiangaha.