Shillong, Oct 5: HNLC bobil dolni ka•mikkenatanirangna kengija ka•donggiparang ong•china gita Mongolbar salo NPP-ni national president aro Meghalaya a•dokni Chief Minister Conrad K Sangma, National People’s Party (NPP)-na kam ka•giparangko aro dilgiparangko didiataha.

Sombar salo, NPP-na kam ka•giparangko HNLC bobil dol ka•mikkenatahani gimin Sangma, NPP-ni manderangna ka•dongatani kattarangko aganangaha.

NPP-na kam ka•enggiparangko ta•raken NPP-oni ong•katchina aro NPP-o napna miksongenggipa manderangkoba napjachina gita Sombar salo HNLC bobil dol mikrakataniko on•angenba, jasani gisepo ia ge•etanirang gita dakjagenchimode Khasi aro Jaintia Hills-o NPP-ni dilgiparangni kosako HNLC bobil dol rakgipa ja•kurangko de•anggen ine ka•mikkenataniko on•angahachim.

Indake ong•engon, NPP-ni manderangna ka•mikkenatanirangko on•ahani gimin aro Shillong-o donggipa NPP office sambao bomako donangahani gimin HNLC-ni kamko jegalatenba, “Lamphrang Blah-ni NPP-o napna salsa skangsa iandake uamang ka•mikkenatanirangko on•aha. Ma NPP bilakrorobaengani giminsa uamang kenengama?” ine Sangma sing•doangaha.Mongolbar salo Lamphrang Blah-ko NPP-o rimchaksona gita dingtangmancha tom•aniko Madan Shad Mawphlang-o ong•atanio a•dokni Chief Minister aro NPP-ni national president Conrad Sangma, jinmana aganprakengmiting somoio ia kattarangko aganaha. Mawphlang bye-election-o susana gita Lamphrang Blah-ko NPP-ni candidate ine ia tom•anion jinmana parakatjolahachim.

Election-na skang kamrangko ka•anio HNLC-ni ka•mikkenatanirangna kenjachina gita NPP-na kam ka•enggiparangko didiangengon, “An•ching an•chingni manderangko chel•chakna aro a•dokko mikkangchi ra•angna gitasa kamko ka•enga. Uni gimin an•ching ka•donggiparang ong•na ine anga da•alo NPP-ni manderangna aro NPP-na kam ka•enggipa manderangko didina ska. Iandake ramram ra•biaigiparangna an•ching bame on•jana.

Chinga na•simang baksa ong•a, iako anga na•simangna ku•rachakenga,” ine Sangma parakataha.

Manderangni bilna bate bilakbatgipa mamingba dongja ineba Sangma ia tom•anio aganaha.