Shillong, Dec 7: A·songo malaria sabisiko man·anirango, Meghalaya baksana Odisha, Chhattisgarh, Jharkhand aro Madhya Pradesh a·dokrangoniko rang·san tang·onaniko nikna gita man·aha ine koboro parakataha.
Iako adita salrangna skang, World Health Organisation (WHO)ni parakatgipa World Malaria Report 2020-oniko talna gita man·ani gitade, batanggimin 2018 bilsi baksa nisusaatode mija bilsi 2019-o Meghalaya a·doko malaria sabisiko man·anio 59.10 percent mangona namen tang·onaniko nikna man·aha. Meghalaya-na agreba, gipin a·dokrango malaria saaniko man·anirango Odisha (40.35 percent), Madhya Pradesh (36.50 percent), Jharkhand (34.96 per cent) aro Chhattisgarh (23.20 percent) namen komianganiko nikna gita man·aha.
Kenbegnigipa malaria sabisiko champengna gita India sorkarini jotton ka·e dingtangmancha tarigipa Long Lasting Insecticidal Nets (LLINs) ba mosorirangko salgro-salaram a·dok damchetrangko man·chape, Chhattisgarh, Jharkhand, Madhya Pradesh aro Odisha-rango 2018 aro 2019 bilsirango kror 5-rangni gita sualanga baksana malaria sabisiko man·batgipa biaprango da·oni financial bilsini somaioba kror 2.25-rangni gita LLIN (mosori)rangko sokataha ba sualtokahanichi ia sabisiko man·batgipa biaprango da·o namen tang·onangaha. Nangdapgipa kror 2.52 LLIN ba mosorirangko sokate on·ani giminba kamrangko ka·atenga. Sorkarini on·gipa mosorirangko song-nokni manderang jakkaltokaha jeni a·selsa a·songo malaria sabisi rang·san tang·onaha.
Mathematics-o pangchake, a·gilsak gimiko malaria sabisiko man·anirangko hisape man·giminko WHO-chi mesokatgipa World Malaria Report 2020-o janapani gitade, malaria sabisiko man·anichi a·songni bal-bojarangko ritchengatna kam ka·anio namen tang·doanirangko nikna man·skaaha.
Malaria sabisiko man·batgipa ong·oba, India-o batanggimin 2018 bilsi baksa tosusaatode 2019 bilsio 17.6 per cent-rangona tang·onaniko mesokaha. Annual Parasitic Incidence (API) ba bilsio malaria saanirangko man·anioba, batanggimin 2017 bilsi baksa nisusaatode 2018 bilsio 27.6 per cent-rangona tang·onani dongaha aro 2019 bilsiode 18.4 per cent-rangona tang·onangskaaha.
