Shillong, July 22: Manchigimin gita, ma·mongni Home Minister Pa Amit Shah-ni Meghalaya a·dokona re·banasiengani gimin chel·chakgipa dolrangko bing·tipe donatsoaha.
Pa Amit Shah baksana sakgni gipin union minister-rang ia July 24 tariko Shillong songjinmaona re·banasienga. Uni wenbao Shah, salgro-salaram a·dokrangni skotong minister-rang, Chief Secretary-rang aro DGP-rang baksa tom·e chanchirimanggen.
Tom·ao, a·dok gipin baksa sima-arini bidingo meligrikjaengani giminba chanchiangjole namgrikataniko ra·bana gita jotton ka·angnaba gnang. Unbaksana, NESAC Shillong-o Convention Hall-ko rikgnigipana pangchakani ro·ongkoba Pa Amit Shah-ni jakchin songangjolgen.
“Nangchongmotani gimin wenbaenganio, chu·onga gita chel·chakanirangko on·ani bidingo police department, pilak nanggipa ja·kurangko de·e kam ka·ataha ine u·iatan baksa, chel·chakgipa dolrangko watdapatani giminde a·dok sorkari bi·dapata dongja ineba a·dokni home minister Pa Lahkmen Rymbui koborna parakataha.
Shah-ni a·dokona wenbaani gimin aganengon, dingtangmancha tom·nasigipana man·adipet chel·chakgipa dolrangko bang·baten donatani gimin a·dokni police aro central agency-rang nangrime kamko ka·atenga ineba minister u·iatjolaha.
Minggipin, Meghalaya a·dokna ILP-ko dabienggipani giminba dingtang dingtang NGO-rangkoba Pa Shah, uni wenbao grongangjolnaba gnang.
